សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ក្រោយពីមានផ្ទុះជំងឺកូវីដ-១៩នៅផ្សារដើមគដល់អាជីវករលក់បន្លែជាច្រើននោះ ភាគីវៀតណាមបានស្នើមកភាគីកម្ពុជា ផ្អាកការនាំបន្លែចូលកម្ពុជាបណ្ដោះអាសន្ន តែដោយឡែកទំនិញផ្សេងៗបើកឱ្យដំណើរការធម្មតា។ នេះបើតាមការបញ្ជាក់របស់លោក វង្ស ចាន់ ប្រធានប៉ុស្តិ៍ច្រកទ្វារព្រំដែនខ្នារតាំងយូ។
លោកប្រធានច្រកអះអាងថា នេះមិនមែនជាបញ្ហាឡើយ បើសិនខាងវៀតណាមបិទមិនឲ្យចូលតាមច្រកជ្រៃធំ ប៉ុន្តែក្រុមអាជីវករខ្មែរយើងបានសម្រុកទៅទិញបន្លែពីច្រកវៀតណាមនៅឯខាងខេត្តតាកែវវិញផងដែរ។
ទន្ទឹមនឹងករណីនេះដែរ នៅឯច្រកក្អមសំណឯណោះវិញ លោក សុទ្ធ សាវឿន ជាប្រធានច្រកបានថ្លែងប្រាប់ដែរថា ខាងច្រករបស់លោកមិនមានការដឹកជញ្ជូនបន្លែធំដុំទេ គឺមានតែបន្ដិចបន្ដួចប៉ុណ្ណោះ ខណៈដែលលោកបានអនុវត្តវិធានការកូវីដ-១៩ចំពោះការចេញ-ចូលរបស់ជនជាតិវៀតណាមមកកម្ពុជា និងពីកម្ពុជាទៅវៀតណាម ធ្វើយ៉ាងណាទប់ស្កាត់មិនឲ្យមានការឆ្លងជំងឺកូវីដ-១៩ជាដាច់ខាត៕ ដោយ៖ ស្អាងជ័យ
រូបភាព៖ឯកសារ ច្រកវៀតណាមនៅឯខាងខេត្តតាកែវ
