ថៅកែដែលបាញ់សម្លាប់កម្មករ ត្រូវសមត្ថកិច្ចបញ្ជូនទៅតុលាការ នៅរសៀលម្សិលមុិញហើយ !

ខេត្តរតនគិរី ៖ នៅរសៀលថ្ងៃទី២៦ ខែមេសា ឆ្នាំ២០២១ម្សិលមុិញ សមត្ថកិច្ចបញ្ជូនខ្លួនជនសង្ស័យជាឃាតកម្នាក់ទៅតុលាការ  បន្ទាប់ពីឃាតករូបនេះ បានបាញ់សម្លាប់បុរសម្នាក់កាលពីថ្ងៃទី២៤ មេសា កន្លងទៅ ជាច្រើនគ្រាប់ បង្ហាញពីភាព សាហាវ ឃោរឃៅបំផុត។
សមត្ថកិច្ចបានបញ្ជាក់ថា, ឃាតកដែលសមត្ថកិច្ចបញ្ជូនខ្លួន រួមទាំងវត្ថុតាងអាវុធខ្លី ១ដើម ម៉ាក្ស CF98 បង់មួយមានគ្រាប់ ៤គ្រាប់ សំបកគ្រាប់បាញ់ហើយចំនួន៥ និងរថយន្តមួយគ្រឿង ទៅតុលាការនោះ មានឈ្មោះ លី ថេងជាង ភេទប្រុស អាយុ ៤៨ឆ្នាំ ជនជាតិខ្មែរ ជាមន្ត្រីយោធា មានស្រុកកំណើតនៅភូមិដំបូក ឃុំព្រែកដំបូក ស្រុកស្រីសន្ធរ ខេត្តកំពង់ចាម។ ទីលំនៅបច្ចុប្បន្ន នៅភូមិគងយុ ឃុំប៉ាតេ ស្រុកអូរយ៉ាដាវ ខេត្តរតនគិរី ។
គួរបញ្ជាក់ថា កាលពីវេលាម៉ោង ២.៣០ រសៀលថ្ងៃទី២៤ ខែមេសា ឆ្នាំ២០២១ មានការផ្ទុះអាវុធចំនួន ៥គ្រាប់ ដែលខ្មាន់កាំភ្លើងជាមន្ត្រីយោធាម្នាក់ និងជាម្ចាស់ចម្ការកៅស៊ូ បានបាញ់សម្លាប់បុរសម្នាក់ជាកម្មកររបស់ខ្លួន នៅក្នុងចម្ការកៅស៊ូ ស្ថិតក្នុងភូមិគងយុ ឃុំប៉ាត់តេ ស្រុកអូរយ៉ាដាវ ខេត្តរតនគិរី បណ្ដាលឱ្យរងរបួសធ្ងន់ ប៉ុន្តែក្រោយពេលបញ្ជូនទៅដល់មន្ទីរពេទ្យបង្អែកស្រុកបរកែវ ជនរងគ្រោះរូបនេះក៏បានស្លាប់បាត់បង់ជីវិតតែម្ដង។ សពបុរសកម្មករ ត្រូវថៅកែបាញ់សម្លាប់នោះមានឈ្មោះ រឹម ចន្ថា អាយុ ៣៧ឆ្នាំ ជនជាតិខ្មែរ មានលំនៅភូមិអូររមៀត សង្កាត់ឡាបានសៀក ក្រុងបានលុង ខេត្តរតនគិរី។ ជនរងគ្រោះត្រូវគ្រាប់ចំឆ្អឹងជំនីខាងស្តាំ ២គ្រាប់ និងត្រូវចំភ្លៅខាងស្តាំ១គ្រាប់។
បើទោះជាយ៉ាងណា ចំពោះមូលហេតុ ដែលបណ្ដាលឲ្យឈានដល់ការបាញ់សម្លាប់ជនរងគ្រោះខាងលើនេះ នៅជាអាថ៌កំបាំងនៅឡើយទេ។ ពីព្រោះមិនទាន់មានប្រភពជាក់លាក់ណាមួយ ហើយសមត្ថកិច្ចក៏មិនបានបញ្ជាក់ពីមូលហេតុនៃអំពើឃាតកម្មនោះ យ៉ាងណាដែរ។ គ្រាន់តែប្រភពខ្លះខ្មាន់កាំភ្លើងចោទថា ជនរងគ្រោះចង់វាយកញ្ចក់រថយន្តរបស់ខ្លួន និងញៀនថ្នាំ៕

ដោយ៖ វណ្ណៈ