សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ មជ្ឍមណ្ឌលគ្រប់គ្រងស្ថានភាពជំងឺ COVID-19 (CCSA) បានប្រកាសនៅថ្ងៃព្រហស្បតិ៍ទី២៩ ខែមេសាម្សិលមិញនេះថា ប្រជាជននៅគ្រប់ខេត្តក្រុងទាំង ៧៧ របស់ប្រទេសថៃ គឺអាជ្ញាធរតម្រូវឲ្យពាក់ម៉ាស់មុខជាដាច់ខាត នៅពេលដែលពួកគេចាកចេញពីទីលំនៅរបស់ពួកគេ ហើយនេះជាច្បាប់ថ្មីមួយក្នុងចំណោមវិធានការណ៍ជាច្រើនទៀត ដើម្បីទប់ស្កាត់ជំងឺ COVID-19 ដែលនឹងមានប្រសិទ្ធភាពចាប់ពីថ្ងៃទី០១ ខែឧសភា ឆ្នាំ២០២១។ នេះបើយោងតាមការចុះផ្សាយរបស់សារព័ត៌មាន The Nation Thailand នៅថ្ងៃសុក្រទី៣០ ខែមេសា ឆ្នាំ២០២១នេះ។
ដោយឡែកជុំវិញបញ្ហានេះដែរ ក្រសួងមហាផ្ទៃថៃ កាលពីដើមសប្តាហ៍នេះ ក៏បានប្រកាសថា ប្រជាជននៅក្នុងខេត្តចំនួន ៦៣ ដែលមានអត្រាឆ្លងជំងឺ COVID-19 ខ្ពស់ជាងគេ នឹងត្រូវពាក់ម៉ាស់មុខជាចាំបាច់មិនថាជាម៉ាស់ក្រណាត់ ឬអនាម័យក៏ដោយនៅពេលដែលពលរដ្ឋនៅកន្លែងសាធារណៈ ហើយពួកគេអាចប្រឈមនឹងការផាកពិន័យរហូតដល់ ២០,០០០ បាត (៦៤០ដុល្លារអាមេរិក) ក្រោមច្បាប់ជំងឺឆ្លងប្រសិនបើមិនគោរពតាម។
ដូច្នេះមានន័យថា មជ្ឍមណ្ឌលគ្រប់គ្រងស្ថានភាពជំងឺ COVID-19 ហៅកាត់ CCSA បានពង្រីកការរឹតត្បឹងទាក់ទងនឹងការពាក់ម៉ាស់ ពីលើអ្វីដែលក្រសួងមហាផ្ទៃ បានប្រកាសកាលពីមុនផងដែរ៕ដោយ៖សហការី
រូបភាព៖ឯកសារ ប្រជាជនថៃ អំឡុងកូវីដ១៩
