សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្រសួងសុខាភិបាលឥណ្ឌ បានប្រកាសនៅថ្ងៃចន្ទទី២៤ ខែឧសភា ឆ្នាំ២០២១នេះថា គិតត្រឹមរយៈពេលមួយថ្ងៃប៉ុណ្ណោះ រកឃើញអ្នកឆ្លងជំងឺ COVID-19ថ្មី ចំនួន ២២២,៨៣៥នាក់បន្ថែមទៀត ចំណែកអ្នកជំងឺរហូតដល់ទៅ ៤,៤៥៥នាក់ទៀតបានស្លាប់។ ចំពោះការប្រការនេះ បាននាំឲ្យចំនួនអ្នកស្លាប់ ដោយសារជំងឺនេះសរុបកើនដល់ជាង ៣០០,០០០នាក់ហើយ នៅទូទាំងប្រទេសឥណ្ឌា។
យោងតាមរបាយការណ៍របស់ក្រសួងសុខាភិបាលឥណ្ឌា ត្រូវបានគេមើលឃើញថា បានកត់ត្រាចំនួនមនុស្សស្លាប់ ១០០,០០០នាក់ដោយសារ COVID-19 ក្នុងរយៈពេលជិត ៩ខែ ហើយរយៈពេល ៧ខែក្រោយមកទៀតទើបចំនួនអ្នកស្លាប់ បានកើនឡើងដល់ ២០០,០០០នាក់។ ប៉ុន្តែនៅរយៈពេលតែ ២៦ថ្ងៃក្រោយមកទៀតប៉ុណ្ណោះ ចំនួនមនុស្សស្លាប់ដោយសារ COVID-19 បានកើនឡើងរហូតដល់លើស ៣០០,០០០នាក់។
របាយការណ៍ដដែល បន្តថា ដូច្នេះមានន័យថា មិនដល់មួយខែផង ឥណ្ឌាមានមនុស្សស្លាប់ដោយសារ COVID-19 រហូតដល់ទៅ ១០០,០០០នាក់ទៀត។ នេះបើតាមការចេញផ្សាយ ដោយសារព័ត៌មានចិនស៊ីនហួរ នារសៀលថ្ងៃចន្ទ ទី២៤ ខែឧសភា ឆ្នាំ២០២១។
គួរបញ្ជាក់ថា ក្រោយការបូកសរុបទិន្នន័យថ្មីៗខាងលើនេះ នាំឲ្យចំនួនករណីឆ្លង COVID-19 សរុបកើនដល់ជាង ២៦,៧៥២,០០០នាក់ ក្នុងនោះមានអ្នកស្លាប់សរុប ៣០៣,៧៥១នាក់ និងជាសះស្បើយឡើងវិញជាង ២៣,៧លាននាក់ ខណៈអ្នកជំងឺ ២.៧២លាននាក់ទៀតកំពុងសម្រាកព្យាបាល។
ដោយឡែកប្រទេសឥណ្ឌា គិតត្រឹមថ្ងៃទី២៣ ខែឧសភា ឆ្នាំ២០២១ម្សិលមិញនេះ បានចាក់វ៉ាក់សាំងបង្ការ COVID-19 សរុប ១៩១លានដូសជូនដល់ប្រជាជន ក្នុងនោះប្រជាជនដែលបានចាក់គ្រប់ដូសមានចំនួន ៤១.៦លាននាក់ ឬស្មើនឹង ៣% នៃចំនួនប្រជាជនសរុប (ឥណ្ឌាមានប្រជាជនសរុបជាង ១,៣០០លាននាក់)៕ ដោយ៖ស តារា
