សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការដកស្រង់ទិន្នន័យ ចេញពីគេហទំព័រ Worldometers បានចុះផ្សាយនៅព្រឹកថ្ងៃពុធ ទី០៩ ខែមិថុនា ឆ្នាំ២០២១នេះថា នៅទូទាំងសហរដ្ឋអាមេរិក បន្តរកឃេីញមនុស្សសរុប ១៣,៥៤២នាក់នាក់ថ្មីទៀតបានឆ្លងជំងឺ COVID-19 ខណៈអ្នកជំងឺ ៤០១នាក់បានស្លាប់ គិតត្រឹមរយៈពេល ២៤ម៉ោងកន្លងទៅនេះ។
គេហទំព័រ Worldometers បាននិយាយបន្តថា ក្រោយការបូកសរុបទិន្នន័យបន្ថែមខាងលើនេះ នាំឲ្យចំនួនករណីឆ្លង COVID-19 សរុបនៅទូទាំងសហរដ្ឋអាមេរិក កើនឡើងដល់ ៣៤,២៤២,៨៦៦ករណី ក្នុងនោះមានអ្នកស្លាប់សរុបចំនួន ៦១៣,០៥២នាក់ និងជាសះស្បើយឡើងសរុប ២៨,២២០,៨៦៣លាននាក់។ ខណៈចំនួនប្រជាជនសរុប ដែលកំពុងរស់នៅលើទឹកដីសហរដ្ឋអាមេរិក គឺជាង ៣៣២លាននាក់។
បើតាមអ្នកជំនាញ កាលពីថ្ងៃអង្គារម្សិលមិញនេះ បានមើលឃើញថា សហរដ្ឋអាមេរិកទំនងជាមិនអាច ឈានដល់គោលដៅតាមការចង់បានរបស់លោក ចូ បៃដិន ក្នុងការចាក់វ៉ាក់សាំងជូនដល់ជនជាតិអាមេរិក ឱ្យបានប្រមាណ ៧០ភាគរយនៅតាមរដ្ឋនីមួយៗនៅត្រឹមថ្ងៃទី០៤ ខែកក្កដាខាងមុខនេះទេ។
ដោយឡែករដ្ឋបាលរបស់លោក ចូ បៃដិន បានអះអាងថា ទោះបីជាគោលមិនត្រូវបានសម្រេចក៏ដោយ ក៏វានឹងមានផលប៉ះពាល់តិចតួចបំផុត ដល់ការងើបឡើងវិញរបស់សហរដ្ឋអាមេរិកទាំងមូល ដែលកំពុងឈានទៅមុខជាបន្តបន្ទាប់ រួចទៅហើយនោះដែរ។
គួរជម្រាបថា សហរដ្ឋអាមេរិក គិតត្រឹមថ្ងៃទី០៨ ខែមិថុនា ឆ្នាំ២០២១ បានចាក់វ៉ាក់សាំងបង្ការជំងឺ COVID-19 សរុបជាង ៣០៣លានដូសហើយ ជូនដល់ប្រជាជនទូទាំងប្រទេស ក្នុងនោះមនុស្សសរុប ១៧១.៣១លាននាក់ (៥២.២%នៃចំនួនប្រជាជនសរុប) បានទទួលការចាក់យ៉ាងហោចណាស់ ១ដូស និងជិត ១៤០លាននាក់ (៤២.៦% នៃចំនួនប្រជាជនសរុប) បានទទួលការចាក់គ្រប់ដូស៕ដោយ៖ស តារា
