សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តហាយឡេនឌ័រទៅបុកគូទរថយន្តកាមរីបាឡែនពីក្រោយនៅនឹងរង្វង់មូលនាងមច្ឆារួចហើយព្យាយាមបើករត់រហូតទៅដល់សាកលវិទ្យាល័យភូមិន្ទភ្នំពេញស្ថិតនៅតាមបណ្ដោយមហាវិថីសហព័ន្ធរុស្ស៊ីក្នុងសង្កាត់ទឹកល្អក់ទី១ ទើបកម្លាំងសមត្ថកិច្ចដេញតាមឃាត់បានរថយន្តនិងអ្នកបើកបរ។
ហេតុការណ៍នេះបានកើតឡើងកាលពីវេលាម៉ោង៩យប់ ថ្ងៃទី១៨ ខែមិថុនា ឆ្នាំ២០២១ នៅចំណុចរង្វង់មូលនាងមច្ឆា ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឱ្យដឹងថា នៅមុនពេលមានគ្រោះថ្នាក់ចរាចរណ៍គេបានឃើញបុរសម្នាក់បើករថយន្តតូយ៉ូតាកាមរីពណ៌ទឹកប្រាក់ពាក់ស្លាកលេខភ្នំពេញ2AL-8844 តាមបណ្ដោយផ្លូវ OCIC ខណៈមកដល់ចំណុចរង្វង់មូលនាងមច្ឆា ស្រាប់តែមានបុរសម្នាក់បើករថយន្តម៉ាកតូយ៉ូតាហាយឡេនឌ័រពណ៌ទឹកប្រាក់ពាក់ស្លាកលេខភ្នំពេញ2AG-5385 មកពីក្រោយយ៉ាងលឿនជាន់ហ្វ្រាំងមិនជាប់បានជ្រុលទៅបុកពីក្រោយពេញទំហឹងបណ្ដាលឲ្យរថយន្តកាមរីរងការខូចខាតផ្នែកខាងក្រោយ តែសំណាងល្អអ្នកបើកបរមិនមានរងគ្រោះថ្នាក់នោះទេ ហើយរថយន្តបង្កមិនបានឈប់ទទួលការខុសត្រូវឡើយគឺបានព្យាយាមបើករត់រហូតទៅដល់មហាវិថីសហព័ន្ធរុស្ស៊ីទល់មុខនឹងសកលវិទ្យាល័យភូមិន្ទភ្នំពេញសិ្ថតក្នុងសង្កាត់ទឹកល្អក់ទី១ ខណ្ឌទួលគោក ទើបកម្លាំងសមត្ថកិច្ចខណ្ឌជ្រោយចង្វា សហការជាមួយនឹងកម្លាំងសមត្ថកិច្ចខណ្ឌ ទួលគោកស្ទាក់ឃាត់ខ្លួនបានរថយន្តនិងអ្នកបើកបរ។
បន្ទាប់ពីកើតហេតុ សមត្ថកិច្ចខណ្ឌទួលគោកក៏បានប្រគល់រថយន្តបង្ករួមទាំងអ្នកបើកបរឲ្យទៅសមត្ថកិច្ចខណ្ឌជ្រោយចង្វានាំយកទៅដោះស្រាយគ្នានៅពេលក្រោយ៕
ដោយ៖ជ្រោយពេជ្រ
