សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើយោងតាមសារព័ត៌មាន vnexpress បានចុះផ្សាយនៅថ្ងៃសុក្រទី០២ ខែកក្កដា ឆ្នាំ២០២១ថា៖ រោងចក្រជាច្រើននៅទីក្រុង HCMC និង Binh Duong បានដាក់ដំឡើងតង់រាប់រយនៅក្នុងទីធ្លារោងចក្ររៀងៗខ្លួនសម្រាប់ឱ្យកម្មករស្នាក់នៅ ដើម្បីសម្រួលដល់ការផលិត និងទប់ស្កាត់វីរុសកូវីដ-១៩។
សារព័ត៌មាន vnexpress បន្តថា ជាក់ស្ដែងកម្មករជិត ៥០០ នាក់នៃរោងចក្រសំបកកង់ និងឡានដឹកទំនិញធុនធ្ងន់ នៅក្រោមក្រុមហ៊ុនភាគហ៊ុនរួមគ្នានៃឧស្សាហកម្មកៅស៊ូខាងត្បូងនៅទីរួមខេត្ត Tan Uyen បានស្នាកនៅក្នុងតង់នៅក្នុងរោងចក្រក្នុងរយៈពេលប៉ុន្មានថ្ងៃកន្លងមកនេះ។ ជាមួយគ្នានេះ រោងចក្រទាំងនោះ បានប្រើទីធ្លាទំនេរនៅក្នុងរោងចក្រដើម្បីបោះតង់ ដូចជា កន្លែងលេងបាល់ទះ កន្លែងវាយកូនបាល និងកន្លែងវាយសី។
សូមជម្រាបថា បេីតាមអនុប្រធានរោងចក្រ លោក Hoang Vinh Phuc បាននិយាយថា បន្ទាប់ពីក្រុមប្រឹក្សាភិបាលកាលពីថ្ងៃទី ២២ ខែមិថុនាកន្លងទៅនេះ បានសម្រេចចិត្តអនុញ្ញាតឱ្យកម្មករទាំងអស់ស្នាក់នៅក្នុងរោងចក្ររយៈពេល ២-៣ សប្តាហ៍។ បន្ទាប់ពីនេះកម្មករចំនួន ៤៨០ នាក់បានជ្រើសរើសរស់នៅក្នុងបរិវេណនោះ ១៧០ នាក់ផ្សេងទៀតបានយល់ព្រមធ្វើការពីផ្ទះ ឬ ឈប់ធ្វើការហើយទទួលបានប្រាក់ឈ្នួលអប្បបរមា។
លោកអនុប្រធានរោងចក្ររូបនេះ បានបន្ថែមថា សម្រាប់កម្មករស្នាក់នៅរោងចក្រ ក្នុងនោះកម្មករប្រុសៗទាំងអស់ត្រូវស្នាក់នៅក្នុងតង់ ខណៈកម្មករស្រី ២៤ នាក់ត្រូវបានស្នាក់នៅបន្ទាប់សម្រាប់អ្នកជំនាញរបស់រោងចក្រ។ ក្រៅពីអាហារ ៣ ពេល និងអាហារសម្រន់ ២ពេល កម្មករម្នាក់ៗទទួលបានប្រាក់ឧបត្ថម្ភចំនួន ១.៥ ម៉ឺនដុល្លារ (៦.៥១ ដុល្លារ) ក្នុងមួយថ្ងៃ។
ដោយឡែកជុំវិញករណីនេះដែរ ប្រធានសម្ព័ន្ធសហជីព Binh Duong លោកស្រី Nguyen Kim Loan ក៏លេីកឡេីងដែរថា រោងចក្រមួយចំនួននៅខេត្តភាគខាងត្បូងដែលមានកម្លាំងពលកម្មមិនលើសពី ៥០០ នាក់កំពុងប្រើប្រាស់កន្លែងធ្វើសិក្ខាសាលា និងឃ្លាំងរបស់ពួកគេ ដើម្បីដំឡើងតង់ធ្វើជាកន្លែងស្នាក់នៅបណ្តោះអាសន្នសម្រាប់កម្មករ។
គួរបញ្ជាក់ថា បេីតាមការបញ្ជាក់ពីប្រធានសម្ព័ន្ធសហជីព Binh Duong បានបន្ថែមថា គិតត្រឹមព្រឹកថ្ងៃសុក្រទី០២ ខែកក្កដាម្សិលមិញនេះ ត្រូវបានគេរាយការណ៍ថា រកឃើញអ្នកឆ្លងជំងឺកូវីដ-១៩ ចំនួន ៤៩៧ករណី ដោយភាគច្រើននៅក្នុងរោងចក្រ និងផ្ទះស្នាក់របស់កម្មករយ៉ាងច្រើន៕ដោយ៖សហការី
