សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ក្នុងរយ:ពេលមួយថ្ងៃមានករណីគ្រោះថ្នាក់ចរាចរណ៍២កន្លែងផ្សេងគ្នាបណ្ដាលឱ្យមនុស្សស្លាប់ម្នាក់និងរបួស៣នាក់ដែលកើតឡើងដោយសារកង់និងម៉ូតូបុកគ្នា ហើយមួយករណីទៀតគឺរថយន្តបុកជាមួយម៉ូតូ២គ្រឿងនៅស្រុករំដួលនិងក្រុងបាវិត។
យោងតាមនគរបាលជំនាញបានឱ្យដឹងថាករណីទី១បានកើតឡើងកាលពីវេលាម៉ោង៤និង២០នាទីរសៀល ថ្ងៃទី០៣ ខែកក្កដា ឆ្នាំ២០២១ នៅចំណុចលើផ្លូវជាតិលេខ១៣ ស្ថិតក្នុងភូមិត្រពាំងក្រួស ឃុំជ្រុងពពេល ស្រុករំដួល ដែលឈ្មោះ គ្រឿន សុគា ភេទប្រុស អាយុ ២៥ឆ្នាំ រស់នៅភូមិត្រសក់ ឃុំកំពង់អំពិល ស្រុករំដួល ខេត្តស្វាយរៀង បានជិះម៉ូតូមួយគ្រឿងម៉ាកហុងដា សេ១២៥ ស៊េរីឆ្នាំ ២០១៩ ពណ៌ខ្មៅ ពាក់ស្លាកលេខ ស្វាយរៀង១N-៤៩៤៤ក្នុងទិសដៅពីជើងទៅត្បូងជ្រុលទៅបុកកុមារីឈ្មោះ ហៀង ស្រីដា អាយុ១០ឆ្នាំ រស់នៅភូមិត្រពាំង
ក្រែត ឃុំជ្រុងពពេល ស្រុករំដួល ខេត្តស្វាយរៀង ដែលកំពុងជិះកង់ស្របទិសគ្នាហើយបានបត់ឆ្វេងឆ្លងផ្លូវខ្វះការប្រុងប្រយ័ត្នបង្កឱ្យមានការភ្ញាក់ផ្អើលតែម្ដង។
ករណីទី២បានកើតឡើងកាលពីវេលាម៉ោង៤និង៣០ នាទី រសៀលថ្ងៃទី០៣ ខែមិថុនា ឆ្នាំ ២០២១នៅលើផ្លូវជាតិលេខ៣១៦(A)ត្រង់ចន្លោះគីឡូម៉ែត្រលេខ០១-០២ ស្ថិតនៅក្នុងភូមិកំពោតលៀប សង្កាត់ព្រៃអង្គញ់ ក្រុងបាវិត ខេត្តស្វាយរៀង មានរថយន្តមួយគ្រឿងម៉ាកហាយឡេនឌ័រ ពណ៌ទឹកមាស ពាក់ស្លាកលេខភ្នំពេញ ២AN-៣៨១៤ ធ្វើដំណើរពីកើតទៅលិច ដោយអ្នកបើកបរឈ្មោះយស់ បូសុវណ្ណាណែល ភេទប្រុស អាយុ៣៣ឆ្នាំ ជនជាតិខ្មែរ មុខរបរទិញនិងលក់រថយន្ត មានទីលំនៅភូមិធ្លក ឃុំក្រោលគោ ស្រុកស្វាយជ្រំ ខេត្តស្វាយរៀង បានជិះទៅបុកប៉ះម៉ូតូមួយគ្រឿងដែលកំពុងធ្វើដំណើរស្របគ្នាពីទិសខាងកើតទៅលិច ម៉ូតូម៉ាកស្មាស់រីវ៉ូពណ៌ខ្មៅ ពាក់ស្លាកវៀតណាម៧០L១-២៩៩៥ បើកបរដោយបុរសម្នាក់មិនស្គាល់អត្តសញ្ញាណបណ្តាលឲ្យស្លាប់។
ប្រភពបន្តថា ក្រោយមករថយន្តខាងលើបានរេចង្កូតទៅបុកប៉ះម៉ូតូមួយគ្រឿងទៀតម៉ាកហុងដា(HONDA)C-125 ពណ៌ខ្មៅ ពាក់ស្លាកលេខ ស្វាយរៀង 1H-6669 ធ្វើដំណើរពីលិចទៅកើត បើកបរដោយឈ្មោះ ស្រេង ស្រីវីន ភេទស្រី អាយុ១៧ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅភូមិចំការលាវ ឃុំព្រៃគគីរ ស្រុកចន្រ្ទាខេត្តស្វាយរៀង បណ្ដាលឱ្យរងរបួសស្រាលផងដែរ។
ក្រោយមកអ្នកបើកបររថយន្តបង្កហេតុសមត្ថកិច្ចបានធ្វើការឃាត់ខ្លួនជាបណ្ដោះអាសន្ននៅប៉ុស្តិ៍រដ្ឋបាលព្រៃអង្គញ់ដើម្បីបំពេញសំណុំរឿងបញ្ជូនទៅការិយាល័យជំនាញខេត្តចាត់ការបន្តតាមច្បាប់។
ចំណែកមធ្យោបាយធ្វើដំណើរមានរថយន្ត និងម៉ូតូទាំង០៣គ្រឿងត្រូវបានសមត្ថកិច្ចអូសយកទៅរក្សាទុកនៅប៉ុស្តិ៍នគរបាលរដ្ឋបាលព្រៃអង្គញ់ ដើម្បីចាត់ការតាមច្បាប់ ។
រីឯសាកសពសមត្ថកិច្ចយកមកតម្កល់ទុកនៅវត្តសាវណ្ណរាមដើម្បីស្វែងរកក្រុមគ្រួសារមកទទួលយកទៅធ្វើបុណ្យតាមប្រពៃណី។
សមត្ថកិច្ចបានបញ្ជាក់ទៀតថា មូលហេតុដោយសារតែរថយន្តម៉ាកហាយឡេនឌ័រ បើកបរល្បឿនលឿនក្នុងស្ថានភាពស្រវឹងស្រាមានជាតិអាល់កុល០,៨១ក្រាមផងដែរ៕
ដោយ៖ យឹម សុថាន
