សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ ជនសង្ស័យម្នាក់ត្រូវបានកម្លាំងនគរបាលយុត្តិធម៌ស្រុកសំបូរសហការជាមួយកម្លាំងនគរបាលប៉ុស្តិ៍រដ្ឋបាលឃុំអូរគ្រៀងនិងប្រជាការពារភូមិ ចុះធ្វេីការស្រាវជ្រាវនិងកំណត់លេីមុខសញ្ញាហើយឃាត់ខ្លួនពីបទលួចម៉ូតូតាមបណ្តឹងរបស់ម្ចាស់ដែលរងគ្រោះ។
ការឃាត់ខ្លួនជនសង្ស័យដែលលួចម៉ូតូនោះសមត្ថកិច្ចបានធ្វើឡើងនៅវេលាម៉ោង៨៖៤០នាទីព្រឹកថ្ងៃទី១៥ខែកក្កដាឆ្នាំ២០២១នៅចំណុចភូមិភ្នំខៀវ ឃុំអូរគ្រៀង ស្រុកសំបូរខេត្តក្រចេះ។
តាមប្រភពបានឱ្យដឹងថា ការឃាត់ខ្លួនជនសង្ស័យនោះយោងតាមបណ្តឹងពីម្ចាស់ម៉ូតូជាជនរងគ្រោះឈ្មោះ ណុប រឹម ភេទប្រុស អាយុ៤១ឆ្នាំ មានទីលំនៅភូមិឃុំខាងលើដែលបានរៀបរាប់ថា នៅវេលាម៉ោង១១៖៣០នាទីថ្ងៃទី១៤ ខែកក្កដាឆ្នាំ២០២១មានករណីអំពេីចោរកម្មលួចម៉ូតូ០១គ្រឿងរបស់គាត់នៅចំណុចភូមិភ្នំខៀវ ឃុំអូរគ្រៀង ស្រុកសំបូរ ខេត្តក្រចេះទើបឈានដល់ចាប់ខ្លួនបានជនសង្ស័យ។
ប្រភពបន្តថា ក្រោយពីកម្លាំងសមត្ថកិច្ចទទូលបណ្តឹងភ្លាមក៏បានចាត់កម្លាំងចុះធ្វេីការស្រាវជ្រាវនិងកំណត់លេីមុខសញ្ញាបានទើបនៅថ្ងៃបន្ទាប់សមត្ថកិច្វឃាត់ខ្លួនបានជនសង្ស័យម្នាក់ឈ្មោះម៉ាត់ ស្មាអែល ភេទប្រុស អាយុ២៦ឆ្នាំ មុខរបរមិនពិតប្រាកដ មានទីលំនៅភូមិឃុំខាងលើ។
ខណៈដែលជនសង្ស័យបានធ្វើសកម្មភាពលួចនោះគឺពេលដែលជនរងគ្រោះជាម្ចាស់ម៉ូតូបានជិះយកទៅទុកនៅក្នុងចម្ការស្វាយចន្ទី លុះពេលចប់ការងារចេញមកវិញស្រាប់តែបាត់តែម្តង។
ម៉ូតូនោះម៉ាកវ៉េវឆ្លាមពណ៌ខ្មៅ អត់ស្លាកលេខ។
ក្រោយពីសមត្ថកិច្ចឃាត់ខ្លួនជនសង្ស័យបានហើយក៏ត្រូវយកទៅឃុំជាបណ្តោះអាសន្ននៅអធិការដ្ឋាននគរបាលស្រុកសំបូរដេីម្បីកសាងសំណុំរឿងបញ្ចូនទៅការិយាល័យជំនាញខេត្តចាត់ការតាមនីតិវិធីបន្ត៕
ដោយ ៖ ជីវ័ន្ត
