សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តព្រូសមួយគ្រឿង បានរេចង្កូតទៅបុកកន្លែងលក់បាយឆា មីឆា គុយទាវ មុខផ្សារព្រែកជ្រៃ រងការខូចខាតយ៉ាងដំណំ និងអ្នកលក់រងរបួសស្រាល កាលពីវលាម៉ោង១១ និង៣០នាទីយប់ ថ្ងៃអាទិត្យ ទី១៨ ខែកក្កដា ឆ្នាំ២០២១ នៅចំណុចមុខផ្សារព្រែកជ្រៃ តាមបណ្ដោយផ្លូវលេខ២១៧ ក្នុងសង្កាត់ស្ពានថ្ម ខណ្ឌដង្កោ រាជធានីភ្នំពេញ ។
បេីតាមសម្ដីស្ត្រីរងគ្រោះនិងជាអ្នកលក់បាយឆា មីឆា ខាងលេីបានប្រាប់ឱ្យដឹងថា មុនកេីតហេតុ រូបគាត់កំពុងឆាបាយវេចខ្ចប់ឲ្យភ្ញៀវ ពេលនោះក៏ក្រឡេកឃេីញរថយន្តបង្កម៉ាក Toyota Prius ពណ៌ស ពាក់ស្លាកលេខភ្នំពេញ 2AQ-0751 បានបើកតាមបណ្ដោយផ្លូវលេខ២១៧ក្នុង ទិសដៅពីជេីងទៅត្បូង ដោយទំនងជាចង់ចូលហូបអីនៅកន្លែងគាត់ តែពេលជិតមកដល់មិនបន្ថយល្បឿនក៏បុកទូកញ្ចក់ និងរបស់របរលក់ដូររបស់គាត់ធ្វើឲ្យរងការខូចខាតយ៉ាងច្រេីន ព្រមទាំងធ្វេីឲ្យគាត់រងរបួសបន្តិចបន្តួចទៀតផង ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់ ហេីយឲ្យភាគីទាំងសងខាងធ្វេីការចរចាគ្នាមួយជំហានសិន ។ បន្ទាប់មកភាគីខាងរថយន្តបង្កបានទទួលកំហុស ហើយយល់ព្រមសងថ្លៃខូចខាត និងថ្លៃព្យាបាលរបួសឲ្យទៅជនរងគ្រោះអ្នកលក់បាយឆា មីឆា ដេីម្បីបញ្ចប់រឿង ៕
ដោយ ៖ ភារ៉ា ដង្កោ
