សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តLEXUS RX450hក្នុងល្បឿនលឿនមិនប្រយ័ត្នបានជ្រុលទៅបុកខឿនផ្លូវហេីយផ្លោងទៅបុកទម្លុះជញ្ជាំងផ្ទះប្រជាពលរដ្ឋបន្ថែមទៀតបង្កឱ្យរងការខូចខាតយ៉ាងដំណំ។ ហេតុការណ៍នេះបានកេីតឡេីងកាលពីវេលាម៉ោង១១ និង១០នាទីយប់ថ្ងៃទី២៩ ខែកក្កដា ឆ្នាំ២០២១ នៅចំណុចគល់ស្ពានដែកបាឡេ តាមបណ្ដោយផ្លូវជាតិលេខ៥ ក្នុងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុនោះមានបុរសម្នាក់បេីករថយន្តម៉ាក LEXUS RX450h ពណ៌ស្ករ ពាក់ស្លាកលេខភ្នំពេញ 2AG-9878 តាមបណ្ដោយផ្លូវជាតិលេខ៥ពីត្បូងទៅជេីងក្នុងល្បឿនលឿន ខណៈមកដល់ចំណុចកេីតហេតុទំនងអ្នកបេីកបរមានបំណងចង់ឡេីងលេីស្ពានដែកបាឡេ ក៏កាច់ចង្កូតមកខាងស្ដាំដៃតែបត់មិនទាន់ក៏ជ្រុលទៅបុកខឿនផ្លូវនិងផ្លោងទៅបុកទម្លុះជញ្ជាំងផ្ទះប្រជាពលរដ្ឋបន្ថែមទៀតបណ្ដាលឲ្យរងការខូចខាតយ៉ាងដំណំ តែក្នុងករណីនេះមិនបណ្ដាលឲ្យមនុស្សណាម្នាក់រងរបួសនោះទេ ។
ក្រោយកេីតហេតុ សមត្ថកិច្ចមូលដ្ឋាន និងផ្នែកជំនាញចរាចរណ៍ខណ្ឌឫស្សីកែវបានចុះមកដល់ តែពិនិត្យឃេីញថា រថយន្តបង្កខាងលេីនេះមិនបានធ្វេីឲ្យខូចខាតសម្បត្តិរដ្ឋ ទេីបឱ្យម្ចាស់រថយន្តដោះស្រាយគ្នាជាមួយម្ចាស់ផ្ទះនិងម្ចាស់ក្រុមហ៊ុនខឿនផ្លូវ ដេីម្បីបញ្ចប់រឿងនៅនឹងកន្លែងតែម្ដង ៕
ដោយ ៖ ភារ៉ា ដង្កោ
