សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ អគ្គិភ័យឆាបឆេះហាងនំប៉័ង យីហោសូរសូគិរីវង់ ដែលស្ថិតនៅតាមបណ្ដោយផ្លូវជាតិលេខ២ ភូមិកណ្ដាល សង្កាត់រលួស ខណ្ឌដង្កោ បង្កនិងការភ្ញាក់ផ្អើលដល់ប្រជាពលរដ្ឋ នឹងសមត្ថកិច្ចចុះជួយអន្តរាគមន៍ទាន់ពេល កាលពីវេលាម៉ោង២និង ១៥នាទីរសៀលថ្ងៃទី២ ខែសីហាឆ្នាំ ២០២១ ។
សមត្ថកិច្ចបានឲ្យដឹងថា ម្ចាស់ហាងនំប៉័ងខាងលើមានឈ្មោះ ចែ លក្ខិណា ភេទស្រី អាយុ៤០ ឆ្នាំស្នាក់នៅកន្លែងកើតហេតុ ។
តាមប្រភពព័ត៌មានពីកម្មករធ្វើការនៅហាងនំប៉័ងបានប្រាប់ឲ្យដឹងថា មុនពេលកើតហេតុពួកគេឮស្នូរសំឡេងផ្ទុះចេញពីឡដុតនំប៉័ងខាងក្រោយពេលនោះក៏មានផ្សែងហុយចេញឡេីងត្រឡោម ហេីយស្រាប់តែមានអណ្ដាតភ្លេីងឆាបឆេះចេញមក ពួកគេក៏បាននាំគ្នាយកបំពង់ពន្លត់អគ្គិភ័យជួយអន្តរាគមន៍បាញ់ជាបឋមអស់ជាច្រើនបំពង់តែមិនរលត់ដោយសារតែស្ថានភាពអណ្ដាតភ្លើងនិងផ្សែងហុយខ្លាំងពេកក៏បានរាយការណ៍ប្រាប់សមត្ថកិច្ចមូលដ្ឋានដើម្បីជួយអន្តរាគមន៍។
បន្ទាប់ពីទទួលបានព័ត៌មានថាមានអគ្គិភ័យឆាបឆេះហាងនំប៉័ងខាងលើ អាជ្ញាធរនិងសមត្ថកិច្ចប៉ុស្តិ៍នគរបាលរដ្ឋបាលរលួស ក៏បានរាយការណ៍ទៅភ្ងាក់ងារបង្ការពន្លត់អគ្គិភ័យដែលប្រចាំការនៅសាលាខណ្ឌដង្កោបានចេញរថយន្តមកបាញ់ពន្លត់ទាន់ពេលវេលា ។ ដោយរថយន្តពន្លត់អគ្គិភ័យដែលចុះទៅជួយអន្តរាគមន៍ក្នុងករណីអគ្គិភ័យខាងលើសរុបទាំងអស់ចំនួន៨ គ្រឿងហើយបានប្រើប្រាស់អស់ទឹកចំនួន៣ គ្រឿង បាញ់រលត់ទាំងស្រុង នៅវេលាម៉ោង ២និង ៤០នាទីរសៀលថ្ងៃទី ២ ខែសីហាឆ្នាំ២០២១។
សមត្ថកិច្ចមូលដ្ឋានបានបញ្ជាក់ថា ករណីអគ្គិភ័យខាងលើមូលហេតុបណ្ដាលមកពី(ឆ្លងចរន្តអគ្គិសនី)ហើយនៅក្នុងករណីខាងលើនេះគឺមិនមានអ្នកណារងរបួសនោះទេ និងមិនរាលដាលឆាបឆេះដល់ផ្ទះអ្នកជិតខាងនោះដែរ ៕
ដោយ ៖ ភារ៉ា ដង្កោ
