សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ឃឹម ស៊ុនសូដា អភិបាល ខណ្ឌកំបូល បានបញ្ជាក់ឱ្យដឹងថា៖ ការងារចាក់វ៉ាក់សាំងបង្ការជំងឺកូវីដ-១៩ជូនកុមារ យុវវ័យចាប់ពីអាយុ១២ដល់១៧ឆ្នាំនៅខណ្ឌកំបូលមាន៧សង្កាត់ សរុបមានចំនួន ១១.០០០នាក់ យើងសម្រេចការងារចាក់វ៉ាក់សាំងជូនកុមាររយៈពេល៧ថ្ងៃនេះបានចំនួន៧.៤៩៧នាក់ គឺសម្រេចបានជាង៨០ភាគរយហើយនៅទីតាំង៥កន្លែង។ ការបញ្ជាក់ឱ្យដឹងបែបនេះពីលោក ឃឹម ស៊ុនសូដា គឺខណៈដែលលោកនិងមន្ដ្រីជំនាញចុះពិនិត្យនិងពន្លឿនការងារចាក់វ៉ាក់សាំងនៅមណ្ឌលវត្ដកំបូល សង្កាត់កំបូល នាព្រឹកថ្ងៃទី០៧ ខែសីហា ឆ្នាំ២០២១ ។
លោក ឃឹម ស៊ុនសូដា បានបញ្ជាក់ថា៖ ចាប់តាំងពីរាជរដ្ឋាភិបាលកម្ពុជាបានបើកយុទ្ធនាការថ្ងៃទី០១ ខែសីហា ឆ្នាំ២០២១ គឺជាថ្ងៃនៃការចាប់ផ្តើមដំណើរការចាក់វ៉ាក់សាំងការពារជំងឺកូវីដ-១៩ ជូនកុមារ និងយុវវ័យអាយុចាប់ពី១២ឆ្នាំដល់១៧ឆ្នាំ ក្នុងភូមិសាស្ត្ររាជធានីភ្នំពេញដែល រហូតមកដល់ថ្ងៃទី០៧ សីហានេះ នៅខណ្ឌកំបូលកុមារចាប់ពីអាយុ១២ឆ្នាំដល់ ១៧ឆ្នាំបានសម្រុកមកទទួលការចាក់វ៉ាក់សាំងទៅតាមមណ្ឌលដែលយើងមានចំនួន៥ទីតាំងបានចំនួន៧.៤៩៧នាក់លើចំនួនកុមារសរុបចំនួន១១.០០០នាក់ បើគិតជាភាគរយសម្រេចបានជាង៨០ ភាគរយហើយ ។
ក្នុងឱកាសនោះដែរ លោក ឃឹម ស៊ុនសូដា ក៏បានធ្វើការអំនាវនាវចំពោះមាតា បីតា អាណាព្យាបាលសូមនាំកូនចៅកុមារ និងយុវវ័យមានអាយុចាប់ពី១២ឆ្នាំ ដល់១៧ឆ្នាំមកចាក់វ៉ាក់សាំងបង្ការជំងឺកូវីដ-១៩នៅទីតាំងដែលបានកំណត់ចំនួន៥កន្លែងឲ្យបានគ្រប់គ្នាៗ ហើយ អាណាព្យាបាល គ្រាន់តែយកមកជាមួយនូវឯកសារមួយចំនួនដូចជា សំបុត្រកំណើត ឬសៀវភៅស្នាក់នៅ ឬសៀវភៅគ្រួសារ ឬលិខិតឆ្លងដែន ដើម្បីយកមកបង្ហាញអាជ្ញាធរភូមិសង្កាត់ដែលបងប្អូន កូន ក្មួយរស់នៅនោះ បងប្អូននិឹងទទួលបានលិខិតអនុញ្ញាតចាក់វ៉ាក់សាំងបានហើយ ។ ជាមួយគ្នានេះដែរ លោកក៏បានអំពាវនាវដល់បងប្អូនប្រជាពលរដ្ឋបន្ដចូលរួមអនុវត្ដតាមវិធានរបស់ក្រសួងសុខាភិបាល ៣កុំ ៣ការពារឲ្យបានគ្រប់ៗគ្នា។
ក្នុងឱកាសនោះលោក ឃឹម ស៊ុនសូដា ក៏បានរំលឹកផងដែរថា៖ បន្ទាប់ពីមានបញ្ជាពីអភិបាលរាជធានីភ្នំពេញ លោក ឃួង ស្រេង ឲ្យអាជ្ញាធរខណ្ឌ សង្កាត់ ភូមិ គឺមិនអនុញ្ញាត្តឱ្យមានជាដាច់ខាតចំពោះការយកលុយជាថ្នូរនៃការផ្តល់បណ្ណចាក់សាំងជូនកុមារ ។ បើមានករណីបែបនេះនឹងមានបញ្ហាប្រឈមជាមួយនឹងអាជ្ញាធររាជធានីភ្នំពេញ ពោលគឺរដ្ឋបាលរាជធានីភ្នំពេញមិនមានការយោគយល់ឡើយ ៕
ដោយ៖ សំរិត
