សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅថ្ងៃទី១២ ខែសីហា ឆ្នាំ២០២១ លោក ថោង រដ្ឋសក្កិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ ដឹកនាំកិច្ចប្រជុំពិភាក្សាតាមប្រព័ន្ធវីដេអូជាមួយលោក OKADA Naoya លេខាទី២ ទទួលបន្ទុកវិស័យកសិកម្ម នៃស្ថានទូតជប៉ុនប្រចាំព្រះរាជាណាចក្រកម្ពុជា និងលោក Nabeshima Katsuhito ស្ថាបនិកក្រុមហ៊ុន Yamato Green ដើម្បីពិភាក្សាលើការរៀបចំគម្រោងកសិ-ទេសចរណ៍នានា ដើម្បីជំរុញការស្តារវិស័យទេសចរណ៍កម្ពុជាឡើងវិញក្នុង និងក្រោយវិបត្តិជំងឺកូវីដ-១៩ តាមរយៈការជំរុញបង្កើតផលិតផលកសិ-ទេសចរណ៍ថ្មីៗ ការជំរុញអភិវឌ្ឍន៍ខ្សែក្រវាត់បៃតង (Green Belt) និងជំរុញតម្លៃបន្ថែមក្នុងវិស័យទេសចរណ៍ (Value added)។
សូមជម្រាបផងដែរថាកន្លងមក ក្រសួងទេសចរណ៍បានចុះអនុស្សារណៈនៃការយោគយល់គ្នាជា មួយក្រុមហ៊ុន YAMATO Green កាលពីខែកញ្ញា ឆ្នាំ២០២០ ដោយមានគោលបំណងជំរុញការអភិវឌ្ឍន៍ខែ្សក្រវាត់បៃតង ដោយផ្តោតសំខាន់លើការអភិវឌ្ឍន៍ឧស្សាហកម្មទេសចរណ៍ កសិ-ទេសចរណ៍ ទេសចរណ៍ធម្មជាតិ និងសហគមន៍ទេសចរណ៍/អេកូទេសចរណ៍នៅកម្ពុជា។
តាមរយៈកិច្ចសហប្រតិបត្តិការនេះ ក្រសួងទេសចរណ៍បាននិងកំពុងរៀបចំគម្រោងសាកល្បងកិស-ទេសចរណ៍ និងការដាំដុះទំនើប (Green House) នៅស្រុកបារាយ៍ខេត្តកំពង់ធំ ដើម្បីសិក្សានិងរៀបចំជាបណ្តើរៗនូវការវិវត្តន៍នៃវិស័យកិស-ទេសចរណ៍តាមរយៈការដាំដុះបន្លែ/ផ្លែឈើធម្មជាតិសុវត្ថិភាពតាមបែបទំនើប សំដៅបំផុសគំនិត និងសម្រួលដល់ជីវភាពប្រជាជនមូលដ្ឋាន និងបានកំពុងភ្ជាប់គម្រោងដាំដុះបន្លែ/ផ្លែឈើធម្មជាតិសុវត្ថិភាពតាមបែបទំនើបរបស់ក្រុមហ៊ុន YAMATO Green ជាមួយវិនិយោគិនដែលជាសមាជិកនៃសភាពាណិជ្ជកម្មខេត្តព្រះសីហនុផងដែរ៕
ដោយ៖ សិលា
