សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ មនុស្សប្រុសស្រីចំនួន ១២នាក់ ត្រូវបានកម្លាំងសមត្ថកិច្ចនគរបាលខេត្តស្ទឹងត្រែង ចាប់ឃាត់ខ្លួនកាលពីយប់ថ្ងៃទី១៨ ខែសីហា ឆ្នាំ២០២១ម្សិលមិញនេះ ជាប់ពាក់ព័ន្ធបើកធ្វើអាជីវកម្ម(ឆ្នោតឡូតូ5D៦ខ្ទង់)ដោយគ្មានលិខិតអនុញ្ញាត ដែលល្មើសនឹងបម្រាមហាមឃាត់ ស្ថិតនៅត្រង់ចំណុចផ្ទះល្វែងមួយកន្លែងស្ថិតក្នុងភូមិថ្មលាត សង្កាត់ស្រះឬស្សី ក្រុងស្ទឹងត្រែង។
ជាក់ស្ដែងយោងតាមរបាយការណ៍របស់សមត្ថកិច្ចមូលដ្ឋានខេត្ត បានឱ្យដឹងនៅថ្ងៃព្រហស្បតិ៍ទី១៩ ខែសីហា ឆ្នាំ២០២១នេះថា៖ កម្លាំងជំនាញការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តស្ទឹងត្រែង សហការជាមួយក្រុមការងារអនុវត្តច្បាប់ថ្នាក់ខេត្ត កាលពីយប់ថ្ងៃទី១៨ ខែសីហា ឆ្នាំ២០២១ម្សិលមិញនេះ បានចុះបង្រ្កាបករណីប្រមូលផ្តុំគ្នាក្នុងផ្ទះល្វែងមួយកន្លែងដែលបានប្រព្រឹត្ត ផ្ទុយនឹងសេចក្កីសម្រេចរបស់រដ្ឋបាលខេត្តស្ទឹងត្រែង។
របាយការណ៍ដដែល បន្តថា ខណៈចុះទៅដល់កន្លែងសមត្ថកិច្ចបានដកហូតភស្តុតាងមួយចំនួនបើកធ្វើអាជីវកម្ម(ឆ្នោតឡូតូ5D៦ខ្ទង់)ដោយគ្មានលិខិតអនុញ្ញាតបើកទីតាំង។
ក្រោយប្រតិបត្តិការដោយមានការសម្របសម្រួលពីលោកព្រះរាជអាជ្ញារងអមសាលាដំបូងខេត្តស្ទឹងត្រែង និងបានយកសំណាកពីជនសង្ស័យចំនួន ១២នាក់( ស្រី ៧នាក់) មកស្នងការដ្ឋាននគរបាលខេត្ត ដើម្បីបន្តនីតិវិធីបញ្ចូនខ្លួនពួកគេទៅសាលាដំបូងខេត្តស្ទឹងត្រែងផងដែរ។
គួរបញ្ជាក់ថា បច្ចុប្បន្នខេត្តស្ទឹងត្រែង មានករណីឆ្លងរាលដាលជំងឺកូវីដ-១៩ សរុបចំនួន ៧៩១នាក់ហើយ និងអ្នកជំងឺស្លាប់ ៦នាក់។ ដោយឡែកក្នុងនោះអ្នកឆ្លងប្រភេទដែលតា(Delta)ចំនួន ៩នាក់ផងដែរ៕
ដោយ៖សហការី
