គ្មាន Messi និង Neymar តែ PSG នៅតែទទួលជ័យជម្នះលើក្រុម Brest ៤ទល់២

ចែករំលែក៖

ក្រុម Paris St-Germain បានប្រកួតដោយគ្មានតារាឆ្នើមៗរាប់បញ្ចូលទាំងកីឡាករចំណូលថ្មី Lionel Messi និង Neymar ប៉ុន្តែនៅតែយកឈ្នះលើក្រុមម្ចាស់ផ្ទះ Brest កាលពីរំលងអធ្រាត្រឈានចូលថ្ងៃទី២១ សីហា ក្នុងលទ្ធផល៤ទល់២ ខណៈដែលពួកគេបានឈ្នះ៣លើកក្នុងចំណោមទាំង៣ប្រកួតទៅលីគកំពូលបារាំង។

គ្រាប់បាល់ដំបូងកីឡាករ Ander Herrera នៅនាទីទី២៣ និងគ្រាប់ទី២រកបានដោយខ្សែប្រយុទ្ធ Kylian Mbappe នៅនាទីទី៣៦ ធ្វើឱ្យក្រុមPSG នាំមុខក្រុមម្ចាស់ផ្ទះ Brest ២ទល់០។ ប៉ុន្តែត្រូវក្រុមម្ចាស់ផ្ទះរកបាន១គ្រាប់សងវិញនៅនាទីទី៤២ ដោយកីឡាករ Franck Honorat ។

ចូលដល់ការប្រកួតក្នុងតង់ទី២ ក្រុម PSG នៅតែមានលទ្ធភាពគ្រប់គ្រងបាល់បានច្រើនជាងក្រុមម្ចាស់ផ្ទះដដែល គឺភាគរយរហូតដល់៧៤ភាគរយ ហើយនៅនាទីទី៧៣ខ្សែបម្រើ Idrissa Gueye រកបាន១គ្រាប់ទៀតឲ្យ PSG។ ប្រហែលជាង១០នាទីក្រោយមកកីឡាករ Steve Mounie របស់ក្រុម Brest បាន១គ្រាប់សងវិញនៅនាទីទី៨៥ ហើយនៅនាទីទី៩០ជិតចប់ការប្រកួតទៅហើយខ្សែប្រយុទ្ធស្លាប Angel di Maria បានសម្រេចបំប៉ោងសំណាញ់ទីបាន១គ្រាប់ទៀត ធ្វើឲ្យចប់ការប្រកួត PSG ឈ្នះ Brest ក្នុងលទ្ធផល៤ទល់២។

ងាកមកម្ចាស់ពានរង្វាន់ Ballon d’Or ៦សម័យ Messi មិនទាន់បង្ហាញខ្លួនឱ្យ PSG នៅឡើយទេបន្ទាប់ពីចេញពីក្រុម Barcelona កាលពីដើមខែនេះ។ ទាំងកីឡាករវ័យ៣៤ឆ្នាំរូបនេះ និងមិត្តរួមក្រុម Neymar បានចាប់ផ្តើមការហ្វឹកហាត់មុនរដូវកាលបន្ទាប់ពីការសម្រាកមួយរយៈក្រោយការប្រកួត Copa America ដែលអាហ្សង់ទីនបានផ្តួលប្រេស៊ីល ១-០ ក្នុងវគ្គផ្តាច់ព្រ័ត្រនៅទីក្រុងរីយ៉ូកាលពីថ្ងៃទី១១ ខែកក្កដា។

នេះគឺជាកម្រិតនៃទេពកោសល្យដ៏គួរឱ្យចាប់អារម្មណ៍ដែលអាចមានចំពោះគ្រូបង្វឹកលោក Mauricio Pochettino ជាជម្រើស១១នាក់ដំបូងរបស់គាត់នៅតែមានកីឡាករអន្តរជាតិជាច្រើនរួមមាន Mbappe, AchrafHakimi, Giorginio Wijnaldum និង Marco Verratti ។

ជ័យជម្នះនេះនាំឱ្យក្រុមរបស់លោក Mauricio Pochettino មាន៩ពិន្ទុឈរលើក្រុម Angers និង Clermont ចំនួន៣ពិន្ទុបណ្តោះអាសន្នដែលក្រុមទាំងពីរនឹងប្រកួតនៅថ្ងៃអាទិត្យក្នុងសប្តាហ៍ទី៣ ៕