សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កាលពីវេលាម៉ោង១រសៀល ថ្ងៃទី២៤ ខែសីហា ឆ្នាំ២០២១នេះ កម្លាំងសមត្ថកិច្ចចម្រុះ នៃគណៈបញ្ជាការឯកភាពខណ្ឌដង្កោ បានឆ្មក់ចុះបង្ក្រាបទីតាំងបញ្ជល់មាន់មួយកន្លែងក្នុងភូមិបារគូ សង្កាត់ដង្កោ ខណ្ឌដង្កោ ដកហូតបានវត្ថុតាងរថយន្ត២គ្រឿង ម៉ូតូ៥គ្រឿង និងមាន់ជល់១ក្បាល ។
ក្នុងប្រតិបត្តិការខាងលេីនេះមានការចូលរួមសហការពីកម្លាំងគណៈបញ្ជាការឯកភាពខណ្ឌដង្កោ កម្លាំងសមត្ថកិច្ចប៉ុស្ដិ៍រដ្ឋបាលដង្កោ និងមន្ត្រីនគរបាលព្រហ្មទណ្ឌខណ្ឌដង្កោ បានចុះបង្ក្រាបទីតាំងបញ្ជល់មាន់ខាងលេី តែក្រុមអ្នកញៀនល្បែងដឹងខ្លនទាន់ក៏នាំគ្នារត់គេចខ្លួនបាត់អស់ ដោយបន្សល់ទុកតែរថយន្តចំនួន២គ្រឿង( Ford Ranger ពណ៌ស ពាក់ស្លាកលេខភ្នំពេញ 2BF-8779 និង Toyota Prius ពណ៌ខៀវ ពាក់ស្លាកលេខភ្នំពេញ 2BD-4775 ) , ម៉ូតូចំនួន៥គ្រឿង និងមាន់ជល់១ក្បាល ។
ក្រោយពីបញ្ចប់ប្រតិបត្តិការនេះរួចរាល់ កម្លាំងគណៈបញ្ជាការឯកភាពខណ្ឌដង្កោ បានធ្វេីការដឹកជញ្ជូនវត្ថុតាងមករក្សាទុកនៅប៉ុស្ដិ៍នគរបាលរដ្ឋបាលដង្កោដេីម្បីឲ្យមន្ត្រីយុត្តិធម៌អនុវត្តតាមនីតិវិធី ៕
ដោយ៖ភារ៉ា ដង្កោ
