សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ ជនសង្ស័យម្នាក់ត្រូវបានកម្លាំងសមត្ថកិច្ចនៃអធិការដ្ឋាននគរបាលស្រុកឧដ្ដុង្គឃាត់ខ្លួនពាក់ព័ន្ធទៅនឹងករណីជួញដូរនិងប្រើប្រាស់គ្រឿងញៀន។
ហេតុការណ៍នេះបានកើតឡើងកាលពីវេលាម៉ោង១៨និង០០នាទី ថ្ងៃសុក្រ ៥រោច ខែស្រាពណ៍ ឆ្លូវ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី២៧ ខែសីហា ឆ្នាំ២០២១ស្ថិតត្រង់ចំណុចព្រៃឬស្សី ខាងជើងភូមិវត្តភ្នំ ឃុំភ្នំតូច ស្រុកឧដ្ដុង្គ ខេត្តកំពង់ស្ពឺ។
សមត្ថកិច្ចបានបញ្ជាក់ឲ្យដឹងថានៅថ្ងៃកើតហេតុមានប្រជាពលរដ្ឋបានរាយការណ៍ថាតែងតែមានមុខសញ្ញាពាក់ព័ន្ធនឹងគ្រឿងញៀនចេញចូលធ្វើសកម្មភាពនៅទីនោះរៀងរាល់ថ្ងៃ ក្រោយទទួលព័ត៌មានកំលាំងអធិការដ្ឋាននគរបាលស្រុកឧដ្ដុង្គ បានចុះទៅដល់ទីតាំងខាងលើ ជាក់ស្ដែងបានឃាត់មុខសញ្ញាសង្ស័យខាងលើឈ្មោះ មាស ថន ភេទប្រុស អាយុ៥៦ឆ្នាំ រស់នៅភូមិរំចេក៤ ឃុំរតនៈ ស្រុកបាត់ដំបង ខេត្តបាត់ដំបង ហើយបានធ្វើការឆែកឆេររកឃើញម្សៅក្រាមពណ៌សសង្ស័យជាគ្រឿងញៀនចំនួន៣កញ្ចប់(២ធំ ១តូច) និង ទូរស័ព្ទដៃចំនួន០២គ្រឿង។
បច្ចុប្បន្នជនសង្ស័យនិងវត្ថុតាងត្រូវបានកម្លាំងជំនាញផ្នែកគ្រឿងញៀននៃអធិការរដ្ឋានស្រុកឧដ្ដុង្គកំពុងកសាងសំណុំរឿងដើម្បីចាត់ការតាមនីតិវិធី ៕
ដោយ៖ ស សម
