សារព័ត៌មាន នគរវត្ត តែងតែនាំមុខគេជានិច្ច
អ្នកចាំទី Emi Martinez និងខ្សែបម្រើ Emiliano Buendia របស់ក្រុម Aston Villa បានធ្វើដំណើរទៅជួបក្រុមជម្រើសជាតិអាហ្សង់ទីនមុនការប្រកួតជម្រុះ World Cup របស់ពួកគេ។
ក្របខ័ណ្ឌ Premier League បានប្រកាសកាលពីដើមសប្តាហ៍នេះថា ក្លិបនឹងមិនបញ្ចេញកីឡាករសម្រាប់ការប្រកួតដែលត្រូវបានលេងនៅក្នុងប្រទេសដែលមានឈ្មោះក្នុងបញ្ជីក្រហមរបស់រដ្ឋាភិបាលអង់គ្លេសឡើយ។
ក្រុមអាហ្សង់ទីនដែលមាន Martinez និង Buendia នឹងទៅចូលរួមក្នុងក្រុមជម្រើសជាតិរបស់ខ្លួនក្នុងការប្រកួតជាមួយក្រុមវ៉េណេស៊ុយអេឡា, ប្រេស៊ីល និងបូលីវីនៅខែក្រោយ ប៉ុន្តែ Aston Villa នឹងអនុញ្ញាតឱ្យពួកគេធ្វើជាតំណាងប្រទេសរបស់ពួកគេសម្រាប់ការប្រកួត២លើកដំបូង។ ពួកគេនឹងមិនលេងវគ្គជម្រុះចុងក្រោយទល់នឹងបូលីវីទេ ប៉ុន្តែវាមានន័យថាអ្នកទាំងពីរនឹងខកខានការធ្វើដំណើរពេលប្រកួតជាមួយ Chelsea នៅថ្ងៃទី១១ ខែកញ្ញា។
សេចក្តីថ្លែងការណ៍មួយនៅលើគេហទំព័រផ្លូវការរបស់ក្លិបបានឲ្យដឹងថាក្រុម Aston Villa អាចបញ្ជាក់ថា Emi Martinez និង Emi Buendia បានធ្វើដំណើរទៅចូលរួមជាមួយក្រុមជម្រើសជាតិអាហ្សង់ទីនដោយមានការអនុញ្ញាតពីក្លិបស្របតាមច្បាប់នៃការហៅចូលការប្រកួតអន្តរជាតិរបស់ FIFA ។កីឡាករទាំងពីរបានព្រមព្រៀងគ្នាដើម្បីត្រៀមខ្លួនសម្រាប់ការប្រកួតជម្រុះ World Cup ពីរលើកដំបូងរបស់អាហ្សង់ទីនទល់នឹងវ៉េណេស៊ុយអេឡានិងប្រេស៊ីល ប៉ុន្តែនឹងមិនចូលរួមក្នុងការប្រកួតអន្តរជាតិលើកទី៣ទល់នឹងបូលីវីឡើយ។ ការរៀបចំទាំងនេះមានន័យថា Martinez និង Buendia នឹងខកខានការប្រកួតក្របខ័ណ្ឌ Premier League ជាមួយក្រុមតោខៀវមុនពេលប្រកួតជាមួយ Everton នៅថ្ងៃទី១៨ ខែកញ្ញាដើម្បីគោរពតាមបទបញ្ជាដាច់ដោយឡែកពីចក្រភពអង់គ្លេសប្រឆាំងនឹង Covid-19 ។
សេចក្តីថ្លែងការណ៍របស់ក្លិបបន្តថា “គ្មានដំណោះស្រាយងាយស្រួលទេដោយសារជំងឺរាតត្បាត Covid-19 នៅតែបន្តជះឥទ្ធិពលអាក្រក់ដល់កីឡាអាជីព។ បន្ទាប់ពីការពិចារណាយ៉ាងប្រុងប្រយ័ត្ន យើងគិតថាផែនការនេះគោរពតាមច្បាប់ការហៅកីឡាករចូលរួមក្រុមជម្រើសជាតិដែលបានបង្កើតឡើងជាយូរមកហើយ និងរក្សាតុល្យភាពនូវសារៈសំខាន់ដែលកីឡាករកំពូលៗតំណាងឱ្យប្រទេសរបស់ពួកគេនៅក្នុងការប្រកួតដ៏សំខាន់ជាមួយនឹងផលប្រយោជន៍ល្អបំផុតរបស់ក្រុម Aston Villa។ យើងសូមជូនពរដល់កីឡាកររបស់យើងទាំងអស់ដែលចូលរួមជាមួយក្រុមជម្រើសជាតិរបស់ពួកគេជួបតែសំណាងល្អក្នុងការប្រកួតនាពេលខាងមុខ”។
គ្រូបង្វឹកក្រុម Tottenham លោក Nuno Espirito Santo បានបង្ហាញថាក្លិបនៅទីក្រុងឡុងខាងជើងកំពុងព្យាយាមគិតគូរពីការខូចខាតរបស់កីឡាករ Cristian Romero និង Giovani Lo Celso ដែលប្រឆាំងនឹងច្បាប់ Premier League ដោយចូលរួមជាមួយក្រុមជម្រើសជាតិ។
ថ្លែងកាលពីសប្តាហ៍មុនអំពីការសម្រេចចិត្តរបស់ក្របខ័ណ្ឌ Premier League នាយកប្រតិបត្តិលោក Richard Masters បាននិយាយថា “ក្លិបនៅ Premier League តែងតែគាំទ្របំណងប្រាថ្នារបស់កីឡាកររបស់ពួកគេដើម្បីតំណាងឱ្យប្រទេសរបស់ពួកគេ នេះគឺជាមោទនភាពរបស់អ្នកពាក់ព័ន្ធទាំងអស់។ ទោះយ៉ាងណាក្លិបបានស្ទាក់ស្ទើរ ប៉ុន្តែបានធ្វើការសន្និដ្ឋានដោយត្រឹមត្រូវថាវាមិនសមហេតុផលទាល់តែសោះក្នុងការអនុញ្ញាតឲ្យកីឡាករក្រោមកាលៈទេសៈថ្មីទាំងនេះ។ លក្ខខណ្ឌនៃការដាក់ឱ្យនៅដាច់ដោយឡែកមានន័យថា សុខុមាលភាព និងភាពរឹងមាំរបស់កីឡាករនឹងត្រូវបានប៉ះពាល់យ៉ាងខ្លាំង យើងយល់ពីបញ្ហាប្រឈមដែលមាននៅក្នុងប្រតិទិនការប្រកួតអន្តរជាតិ ហើយនៅតែបើកចំហចំពោះដំណោះស្រាយដែលអាចដំណើរការបាន” ៕
ដោយ៖ ភារៈ(រូបភាព ៖ The Sun)
