សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ បេីយោងតាមផេកហ្វេសប៊ុកផ្លូវការរបស់លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានឱ្យដឹងថា នៅថ្ងៃចន្ទទី១៣ ខែកញ្ញា ឆ្នាំ២០២១នេះ លោកសូមថ្លែងអំណរគុណយ៉ាងជ្រាលជ្រៅចំពោះ អ្នកមីង ផុន ឡៃ ម្ចាស់ចុងភៅ ផុន ឡៃ និងក្រុមគ្រួសារ ដែលបានចូលរួមឧត្ថម្ភអង្ករចំនួន ១០៥បាវ(២៥គីឡូ) និងថវិកា៥លាន(ប្រាំលាន)រៀល ដល់រដ្ឋបាលខេត្តកណ្តាល ដើម្បីប្រើប្រាស់ក្នុងការងារ គ្រប់គ្រង បង្ការទប់ស្កាត់ការឆ្លងរីករាលដាលជំងឺកូវីដ-១៩ ក្នុងភូមិសាស្ត្រខេត្តកណ្តាល។
លោក គង់ សោភ័ណ្ឌ បានថ្លែងបន្តថា នេះជាទឹកចិត្តប្រកបដោយសទ្ធាជ្រះថ្លា ពោរពេញដោយក្តីសប្បុរសរបស់ អ្នកមីង និងក្រុមគ្រួសារ គឺជាកាយវិការឆ្លុះបញ្ចាំងពីការយកចិត្តទុកដាក់ក្នុងការជួយគ្នា ក្នុងគ្រាលំបាក និងត្រូវបានចងចាំទុកដោយរដ្ឋបាលខេត្ត និងប្រជាពលរដ្ឋទូទាំងខេត្តកណ្តាលជារៀងរហូត។
ជាមួយគ្នានេះរដ្ឋបាលខេត្តកណ្តាល នឹងយកចិត្តទុកដាក់ប្រើប្រាស់អំណោយដ៏សប្បុរសនេះប្រកបដោយតម្លាភាពក្នុងការបម្រើសកម្មភាពមនុស្សធម៌ ជួយដល់ជនរងគ្រោះដោយជំងឺកូវីដ-១៩។
ជាចុងក្រោយ លោកអភិបាលខេត្ត សូមជូនពរ អ្នកមីង និងក្រុមគ្រួសារ សូមមានសុខភាពល្អ កម្លាំងមាំមួន ជោគជ័យគ្រប់ភារកិច្ច និងសូមប្រកបដោយព្រះពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
ដោយ៖សហការី
