សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាមបានចុះពិនិត្យនិងដាក់បទបញ្ជាដល់មន្ត្រីក្រោមការគ្រប់គ្រង របស់លោកអោយរៀបចំសម្រួលសណ្ដាប់ធ្នាប់បញ្ចៀសគ្រោះថ្នាក់និងហានិភ័យផ្សេងៗដែលអាចកើតមានឡើង នៅលើកំណាត់ផ្លូវជាតិលេខ៧ ដែលបានលិចទឹក(ទឹកភ្លៀង) ប្រវែង១០០០ម៉ែត្រ ស្ថិតនៅចំណុចភូមិកប្បាស ឃុំខ្វិតធំ ស្រុកព្រៃឈរ ខេត្តកំពង់ចាម ។
បទបញ្ជារបស់លោកអ៊ុន ចាន់ដា ធ្វេីឡេីងនៅព្រឹកថ្ងៃទី២១ ខែកញ្ញា ឆ្នាំ២០២១នេះ តម្រូវឲ្យមន្ទីរសាធារណការ និង ដឹកជញ្ជូន មន្ត្រីជំនាញ មន្ទីរ អង្គភាព និង អាជ្ញាធររដ្ឋបាលស្រុកព្រៃឈរ កងកំលាំងប្រដាប់អាវុធទាំងបី ចុះអន្តរាគមន៍ដោះស្រាយបញ្ហាខាងលើនេះ ។
លោក អ៊ុន ចាន់ដា បានបញ្ជាក់ប្រាប់ថា កំណាត់ផ្លូវនេះ ក្រោយពីទទួលរងនូវទឹកភ្លៀងធ្លាក់រយៈពេលមួយទៅពីរថ្ងៃជាបន្តបន្ទាប់មក ធ្វើឲ្យលូមួយចំនួនស្ទះ បណ្ដាលឱ្យលិចផ្លូវ ក៏ដូចជាប្រព័ន្ធលូមួយចំនួន ហូរមិនទាន់ ។
លោកបន្តថា ដោយពិនិត្យឃើញស្ថានភាពជាក់ស្ដែង លោកអភិបាលនៃគណៈអភិបាលខេត្តកំពង់ចាមបានចុះអន្តរាគមន៍យកអេស្កាមវ៉ាទ័រ បើកកាយមុខទឹកដើម្បីរំដោះទឹកភ្លៀង ស្ដារប្រព័ន្ធលូ ស្ដារប្រឡាយទឹក ត្រួសត្រាយព្រៃដែលបាំងមុខទឹក ដើម្បីសំរួលចរន្តទឹកឲ្យហូរបានកាន់តែលឿន លោកអភិបាលខេត្ត ក៏បានឲ្យ មន្ទីរសាធារណការ និងដឹកជញ្ជូន និង រដ្ឋបាលស្រុកព្រៃឈរ និងក្រុមអ្នកជំនាញ បន្តអន្តរាគមន៍ ដើម្បីឱ្យទឹកឆាប់ស្រក ដើម្បីបង្កភាពងាយស្រួលដល់ប្រជាពលរដ្ឋ ក៏ដូចជា ផ្តល់ភាពងាយស្រួលដល់អ្នកធ្វើដំណើរតាមដងផ្លូវ ៕
ដោយ ៖ វណ្ណៈ
