សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមផេកហ្វេសប៊ុកផ្លូវការរបស់នាយកដ្ឋានប្រឆាំងបទល្មើសបច្ចេកវិទ្យា បានឱ្យដឹងនៅរសៀលថ្ងៃទី២១ ខែកញ្ញា ឆ្នាំ២០២១នេះថា៖ បន្ទាប់ពីប្រទេសចិនបានចេញបទបញ្ជា ដែលកំណត់មិនឱ្យក្មេងៗក្រោមអាយុ ១៨ឆ្នាំលេងហ្គេមអនឡាញលើសពី ៣ម៉ោងក្នុងមួយសប្តាហ៍មក ក្រុមហ៊ុន ByteDance បានដាក់ចេញលក្ខខណ្ឌ ដើម្បីកំណត់ការប្រើប្រាស់ទាក់ទងទៅនឹងកម្មវិធី Douyin ដែលជាកម្មវិធីស្រដៀងគ្នាទៅនឹងកម្មវិធី TikTok។
នៅក្នុងការកំណត់ថ្មីនេះ អ្នកប្រើប្រាស់ណាដែលបានបញ្ជាក់ថា ពួកគេមានអាយុក្រោម ១៤ឆ្នាំ កម្មវិធីនឹងដាក់ការកំណត់មិនឱ្យពួកគេប្រើកម្មវិធីលើកពី ៤០នាទីក្នុងមួយថ្ងៃ។ ជាងនេះទៅទៀត កុមារនឹងមិនអាចប្រើកម្មវិធីចាប់ផ្ដើមពីម៉ោង ១០យប់ ដល់ម៉ោង ៦ព្រឹក។
នាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់បន្ថែមថា ការកំណត់ថ្មីនេះគឺ សម្រាប់តែអ្នកប្រើប្រាស់ណាដែលបានផ្ដល់ឈ្មោះ និងថ្ងៃខែឆ្នាំកំណើតពិតប្រាកដ ដូច្នេះក្រុមហ៊ុនបានស្នើសុំឱ្យអាណាព្យាបាលធ្វើការចុះឈ្មោះកូនរបស់ពួកគេឱ្យបានត្រឹមត្រូវ។
គួរបញ្ជាក់ផងដែរថា ការពីចុងខែសីហាកន្លងទៅ អាជ្ញាធរចិនបានចេញបទបញ្ជា ដែលកំណត់មិនឱ្យក្មេងៗក្រោមអាយុ ១៨ឆ្នាំលេងហ្គេមអនឡាញលើសពី ៣ម៉ោងក្នុងមួយសប្តាហ៍ ហើយពួកគេអាចលេងហ្គេមបានតែនៅថ្ងៃចុងសប្តាហ៍ និងថ្ងៃបុណ្យជាតិ ចាប់ពីម៉ោង ៨យប់ដល់ម៉ោង ៩យប់តែប៉ុណ្ណោះ។ បទបញ្ជាថ្មីនេះគឺដើម្បីការពារសុខមាលភាពរបស់កុមារទាំងផ្លូវកាយ និងផ្លូវចិត្តពីភាពប៉ះពាល់ដោយសារតែការលេងហ្គេមអនឡាញច្រើនហួសហេតុពេក៕
ដោយ៖សហការី
