សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ យ៉ាងហោចមានមនុស្សម្នាក់បានស្លាប់ភ្លាមៗនៅនឹងកន្លែង និងម្នាក់ទៀតរងរបួសធ្ងន់ ខណៈកំពុងជិះម៉ូតូហើយត្រូវរថយន្តបុក នៅតាមបណ្តោយផ្លូវជាតិលេខ៤១ចន្លោះគីឡូម៉ែត្រ៤៤-៤៥ស្ថិតក្នុងភូមិព្រៃរំដួលត្បូង ឃុំបសេដ្ឋ ស្រុកបសេដ្ឋ ខេត្តកំពង់ស្ពី កាលពីយប់ថ្ងៃទី៣ ខែតុលា ឆ្នាំ២០២១ ។
មន្រ្តីនគរបាលចរាចរណ៍ស្រុកបសេដ្ឋបានឲ្យដឹងថា មុនកើតហេតុគេឃើញម៉ូតូមួយគ្រឿងម៉ាកហុងដា ZOOMER X ពណ៌ស ស៊េរីឆ្នាំ២០១៨ ពាក់ស្លាកលេខ ភ្នំពេញ១GD-៤៩២៧ ។
ម៉ូតូនេះបើកបរដោយឈ្មោះ ហួន មីហុង ភេទប្រុស អាយុ២១ឆ្នាំ រស់នៅភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល(ស្លាប់) បើកបរពីជើងទៅត្ត្បូង រួមដំណើរជាមួយឈ្មោះ ហួន គឹមហេង ភេទស្រី អាយុ១០ឆ្នាំ ត្រូវជាប្អូនស្រីអ្នកបើកបរម៉ូតូ រងរបួសត្រង់កដៃខាងស្តាំ រស់នៅក្នុងភូមិឃុំជាមួយគ្នាបើកមកដល់កន្លែងកើតហេតុ។លុះមកដល់កន្លែងកើតហេតុក៏ត្រូវរថយន្តមួយគ្រឿងមិនស្គាល់ម៉ាកបុកចំពីមុខម៉ូតូ ហើយក៏បើកទៅទិសខាងត្បូងគេចបាត់ទៅ។
ប្រភពដដែលបានឲ្យដឹងទៀតថាក្រោយកើតហេតុក្មេងស្រីរងគ្រោះត្រូវបានរថយន្តសាមុយដឹកយកទៅសង្គ្រោះនៅឯមន្ទីរពេទ្យបង្អែកខេត្ត។ ឯសពជនរងគ្រោះត្រូវបានក្រុមគ្រួសារដឹកយកទៅស្រុកកំណើតដើម្បីធ្វើបុណ្យតាមប្រពៃណី។ចំពោះវត្ថុតាងម៉ូតូត្រូវយកមករក្សាទុកនៅអធិការដ្ឋាននគរបាលស្រុកបសេដ្ឋ ដើម្បីរង់ចាំការដោះស្រាយតាមនីតិវិធីពេលក្រោយ៕
ដោយ ៖ ប្រាថ្នា
