សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ កម្លាំងអធិការដ្ឋាននគរបាលក្រុងប៉ោយប៉ែត បានឃាត់ខ្លួន ជនសង្ស័យជាជាងសំណង់ម្នាក់ក្រោយធ្វើសកម្មភាពលួចម៉ូតូរបស់ប្រជាពលរដ្ឋនៅជាយដែនប៉ោយប៉ែត ខេត្តបន្ទាយមានជ័យ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានមានប្រសាសន៍ថា ជនសង្ស័យដែលសមត្ថកិច្ចឃាត់ខ្លួនមានឈ្មោះ មួង ចំរឿន ភេទប្រុស អាយុ ២៦ឆ្នាំ មុខរបរ ជាងសំណង់ ស្នាក់នៅម្តុំផ្កាយ៣ ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចរបស់លោកឃាត់ខ្លួនជនសជនសង្ស័យរូបនេះ ក្រោយពីទទួលបានពាក្យបណ្តឹងពីជនរងគ្រោះម្នាក់ឈ្មោះ ផាន់ ចំរើន ភេទប្រុសអាយុ២៥ឆ្នាំថា កាលពីថ្ងៃទី១០ ខែតុលា ឆ្នាំ២០២១ ខ្លួនបាត់ម៉ូតូមួយគ្រឿងម៉ាក ហុងដា zoomer-x ដែលមានស្លាកលេខ 1P-0166 លេខតួ 5129994 លេខម៉ាស៊ីន 01299994 ពេលដាក់បញ្ឈរមុខផ្ទះ។ម៉ូតូនេះបាត់នៅអំឡុងវេលាម៉ោងប្រហែល ១១និង ៣៥នាទីព្រឹក។
ក្រោយទទួលពាក្យបណ្តឹងភ្លាមកម្លាំងផែនព្រហ្មទណ្ឌអធិការដ្ឋាននគរបាលក្រុងប៉ោយប៉ែត បានចុះស្រាវជ្រាវនិងឃាត់ខ្លួនជនសជនសង្ស័យឈ្មោះ មួង ចំរឿន យកមកសួរនាំ។ ពេលនោះជនសង្ស័យបានសរភាពថា ខ្លួនពិតជាបានធ្វើសកម្មភាពលួចម៉ូតូ zoomer-x ខាងលើប្រាកដមែន ។
បច្ចុប្បន្ន ម៉ូតូត្រូវបានប្រគល់ឲ្យម្ចាស់ដើមវិញ រីឯជនសង្ស័យត្រូវបានបញ្ជូនទៅសាលាដំបូងខេត្តចាត់ការតាមនីតិវិធី៕
ដោយ ៖ ប្រាថ្នា
