សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ អគ្គិភ័យបានឆាបឆេះរថយន្តស៊េរីទំនើបម៉ាកALPHARD មួយគ្រឿងនៅក្នុងឃ្លាំង បង្កការភ្ញាក់ផ្អេីលដល់បងប្អូនប្រជាពលរដ្ឋ និងសមត្ថកិច្ចមូលដ្ឋានចេញរថយន្តពន្លត់អគ្គិភ័យមកធ្វើអន្តរាគមន៍បាញ់ទឹកពន្លត់កាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី១៦ ខែតុលា ឆ្នាំ២០២១ នៅចំណុចឃ្លាំងទុកចោលមួយកន្លែង ជិតសាលាខណ្ឌដង្កោ តាមផ្លូវលេខ២១៧ សង្កាត់ដង្កោ ខណ្ឌដង្កោ រាជធានីភ្នំពេញ។
បេីតាមប្រភពព័ត៌មានពីបងប្អូនប្រជាពលរដ្ឋដែលរស់នៅក្បែរទីតាំងកើតហេតុបានឱ្យដឹងថា មុនពេលកេីតហេតុ ពួកគាត់បានឃេីញផ្សែងហុយចេញពីក្នុងឃ្លាំងខាងលើដោយមិនដឹងថាឆេះអ្វីនោះទេ ព្រោះថាឃ្លាំងនោះគឺម្ចាស់ចាក់សោទុកចោលទាំងក្នុងទាំងក្រៅ ហើយដោយមានមន្ទិលសង្ស័យពួកគាត់ក៏បានរាយការណ៍ទៅសមត្ថកិច្ចមូលដ្ឋានឲ្យចុះមកពិនិត្យមេីល ក៏ឃើញថាមានផ្សែងហុយចេញពីឃ្លាំងខ្លាំងទៅៗ ទេីបសមត្ថកិច្ចមូលដ្ឋាន បានទំនាក់ទំនងហៅរថយន្តពន្លត់អគ្គិភ័យរបស់ការិយាល័យបង្ការពន្លត់អគ្គិភ័យនៃស្នងការដ្ឋានរាជធានីភ្នំពេញដែលប្រចាំការនៅសាលាខណ្ឌដង្កោឲ្យមកជួយធ្វើអន្តរាគមន៍ចំនួន២គ្រឿង និងបានយក ឧបករណ៍មកកាត់សោឃ្លាំងចូលទៅ ឃើញថាមានភ្លើងកំពុងតែឆាបឆេះរថយន្តមួយគ្រឿងម៉ាក ALPHARD ដែលម្ចាស់ទុកចោលនៅក្នុងឃ្លាំង។ ពេលឃើញដូច្នេះកម្លាំងជំនាញក៏បានធ្វើការបាញ់ពន្លត់អស់ទឹកចំនួន២ឡានធ្វើឲ្យភ្លើងរលត់ទៅវិញទៅវេលាម៉ោង១និង៤០នាទីរំលងអធ្រាត្រថ្ងៃដដែល ។
ក្នុងករណីអគ្គិភ័យនេះដែរគឺមិនបង្កឲ្យមានការរីករាលដាលដល់ផ្ទះបងប្អូនប្រជាពលរដ្ឋនោះទេ គឺគ្រាន់តែឆេះរថយន្តស៊េរីទំនើបម៉ាក ALPHARD មួយគ្រឿងតែប៉ុណ្ណោះ ហើយចំពោះមូលហេតុដែលបណ្ដាលឲ្យមានការឆាបឆេះនេះគឺ បណ្ដាលមកពីឆ្លងចរន្តភ្លេីងក្នុងរថយន្ត ៕
ដោយ ៖ ភារ៉ា ដង្កោ
