សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តដឹកខ្សាច់ធុនធំ៣គ្រឿងដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ បរិស្ថាន អនាម័យ និងបំពានម៉ោងពេលធ្វើចរាចរណ៍ ត្រូវបានលោកចេង មុនីរ៉ា អភិបាលខណ្ឌច្បារអំពៅ ណែនាំឱ្យក្រុមការងារចុះចាប់ជាបន្ទាន់យកមករក្សាទុកបណ្តោះអាសន្នរង់ចាំការសម្រេចពីសាលារាជធានីភ្នំពេញ ។
យុទ្ធនាការនេះបានធ្វើឡើងនៅវេលាម៉ោង៨៖៤០នាទីយប់ថ្ងៃទី២០ ខែតុលា ឆ្នាំ២០២១ នៅលើផ្លូវជាតិលេខ១ សង្កាត់ច្បារអំពៅទី២ ខណ្ឌច្បារអំពៅ នៅគ្រាដែលរថយន្តដឹកខ្សាច់ទាំង៣គ្រឿងបើកបរបម្រុងឆ្លងស្ពានព្រះមុនីវង្សចូលមកក្នុងរាជធានីភ្នំពេញ ។
លោកគុយ គឹមហៀង ប្រធានការិយាល័យសាធារណការ ដឹកជញ្ជូននិងសណ្តាប់ធ្នាប់ បរិស្ថាន អនាម័យ ខណ្ឌបានប្រាប់ថា ករណីចាប់រថយន្តដឹកខ្សាច់នេះធ្វើឡើងបន្ទាប់ពីអ្នកបើកបររថយន្តទាំង៣គ្រឿងបានបើកបរបំពានបម្រាមហាមឃាត់របស់សាលារាជធានីភ្នំពេញនិងសាលាខណ្ឌច្បារអំពៅ ដែលមិនឱ្យរថយន្តដឹកដី ដឹកខ្សាច់ធុនធំបើកឆ្លងកាត់ ស្ពានព្រះមុនីវង្ស ។ ដោយសារតែមិនអនុវត្តតាមការណែនាំនេះហើយទើបអាជ្ញាធរខណ្ឌច្បារអំពៅចាត់វិធានការចាប់រថយន្តដឹកខ្សាច់មករក្សាទុកបណ្តោះអាសន្នដើម្បីជាការព្រមានដល់ម្ចាស់រថយន្ត ។ ចំពោះចំណាត់ការបន្ត យ៉ាងណានោះរង់ចាំការសម្រេចរបស់ សាលារាជធានីភ្នំពេញនិងការសម្រេចរបស់លោកអភិបាលខណ្ឌច្បារអំពៅ ថាតើត្រូវរក្សាទុកប៉ុន្មានថ្ងៃ ផាកពិន័យឬមួយឱ្យម្ចាស់រថយន្តធ្វើកិច្ចសន្យា ៕
ដោយ ៖ សណ្តោស
