សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានជិះម៉ូតូតាមផ្លូវ តែអកុសលត្រូវរថយន្តហ៊ីយ៉ាន់ដាយដឹកមាន់បេីកបញ្ច្រាសទិសក្នុងល្បឿនលឿនមកបុកពេញទំហឹងនិងផ្ទប់ជញ្ជំងផ្ទះប្រជាពលរដ្ឋ បណ្ដាលឲ្យស្លាប់ភ្លាមៗនៅនឹងកន្លែង កាលវេលាម៉ោង១ និង៥០នាទីរំលងអធ្រាត្រ ឈានចូលថ្ងៃអាទិត្យ ទី០៧ ខែ វិច្ឆិកា ឆ្នាំ២០២១ នៅតាមបណ្ដោយផ្លូវ៣៧១ កែងនិងផ្លូវ២៧១ ក្នុងសង្កាត់បឹងទំពុន២ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកេីតហេតុគេឃើញរថយន្តម៉ាក ហ៊ីយ៉ាន់ដាយក្បាលពណ៌ស ពាក់ស្លាកលេខភ្នំពេញ3A-2304 បើកដោយបុរសម្នាក់រួមដំណើរនិងព្រូ៤នាក់ ធ្វេីដំណេីរទិសដៅពីត្បូងទៅជើងក្នុងល្បឿនលឿន ខណៈមកដល់ចំណុចកើតហេតុខាងលើក៏ជ្រុលចង្កូតទៅបុកម៉ូតូ Suzuki Lets ពណ៌ស ពាក់ស្លាកលេខ កំពង់ចាម1T-0899 ជិះដោយបុរសម្នាក់ ទិសដៅបញ្ច្រាសគ្នាពីជើងទៅត្បូង ពេញទំហឹងនិងរុញទៅផ្ទប់ជញ្ជាំងផ្ទះប្រជាពលរដ្ឋបណ្ដាលឲ្យស្លាប់ភ្លាមៗនៅនឹងកន្លែង ចំណែកម្ចាស់រថយន្តនិងព្រូ២នាក់បានរត់គេចខ្លួនបាត់ ខណៈព្រូ២នាក់ទៀតនៅយកទឹកមកជះពន្លត់ម៉ូតូដែលមានផ្សែងហុយខ្លាចឆេះ ។ ដោយឡែកជញ្ជាំងផ្ទះប្រជាពលរដ្ឋត្រូវបាក់រប៉ាតរប៉ាយផងដែរ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ ហេីយទាក់ទងបន្តទៅសមត្ថកិច្ចជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញ ឲ្យមកធ្វេីការវាស់វែងយករថយន្តបង្កនិងម៉ូតូរងគ្រោះទៅរក្សាទុក រង់ចាំដោះស្រាយតាមច្បាប់។
ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុ និងស្រាវជ្រាវរកក្រុមគ្រួសារឲ្យមកទទួលយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
