សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ នេះបេីយោងតាមប្រភពព័ត៌មានពីកងរាជអាវុធហត្ថខេត្តកំពង់ស្ពឺ បានឱ្យដឹងនៅរសៀលថ្ងៃអាទិត្យទី០៧ ខែវិច្ឆិកា ឆ្នាំ២០២១នេះថា៖ ម៉ូតូមួយគ្រឿង ម៉ាកហុងដាគុបមូល C90 ពណ៌ទឹកប្រាក់ គ្មានស្លាកលេខ ដែលប្រទះឃើញនៅដីឡូតិ៍មួយកន្លែង ស្ថិតនៅភូមិពុទ្រា ឃុំត្រពាំងជោ ស្រុកឱរ៉ាល់ កាលពីថ្ងៃទី០១ ខែឧសភា ឆ្នាំ២០២១ ហើយបានយកមករក្សាទុកនៅមូលដ្ឋានកងរាជអាវុធហត្ថស្រុកឱរ៉ាល់នោះ ពេលនេះមន្រ្តីជំនាញបានធ្វេីការប្រគល់ជូនម្ចាស់ដើមវិញ ក្រោយពិនិត្យឯកសារច្បាស់លាស់។
ប្រភពដដែលបន្តថា ក្រោយពីបានការអនុញ្ញាតពីសំណាក់លោកឧត្តមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្ត កម្លាំងមូលដ្ឋានកងរាជអាវុធហត្ថស្រុកឱរ៉ាល់ បានប្រគល់ម៉ូតូខាងលេីនេះ ឱ្យទៅម្ចាស់ឈ្មោះ ឆោម ចាន់ហុី ភេទប្រុស អាយុ២៨ មុខរបរ កម្មកររោងចក្រ មានទីលំនៅភូមិថ្មី សង្កាត់រកាធំ ក្រុងច្បារមន ខេត្តកំពង់ស្ពឺ។
ដោយឡែកម្ចាស់ម៉ូតូឈ្មោះ ឆោម ចាន់ហុី ក៏បានអះអាងដែរថាម៉ូតូរបស់ខ្លួនបានបាត់យូរមកហើយ។ ជាមួយគ្នានោះ រូបគាត់បានថ្លែងអំណរគុណចំពោះកម្លាំងសមត្ថកិច្ច ដែលខិតខំធ្វេីការបម្រេីប្រជារាស្រ្ត និងស្រាវជ្រាវរកឃេីញម៉ូតូរបស់គាត់វិញផងដែរ៕
ដោយ៖សហការី
