សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ កំលាំងនគរបាល នៃស្នងការដ្ឋាននគរបាលខេត្តកំពង់ស្ពឺ ចេញប្រតិបត្តិការសហការជាមួយអធិការក្រុង ស្រុក អនុវត្តតាមបទបញ្ជាលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ ក្នុងផែនការក្ដៅបង្រ្កាបមុខសញ្ញាក្មេងទំនេីងនៅទូទាំងខេត្ដកំពង់ស្ពឺផ្ដាច់ព័ត្រ្ដក្នុងឆ្នាំ២០២១នេះ។
សូមបញ្ជាក់ថា, កាលពីថ្ងៃទី០៧ ខែវិច្ឆិកា ឆ្នាំ២០២១ កម្លាំងនគរបាលស្រុកឧដុង្គ បានឃាត់មុខសញ្ញាក្មេងទំនើងចំនួន១៣ នាក់ ដែលកាន់កាំបិតផ្គាក់ និងដាវធ្វេីសកម្មភាពអូសបង្កការភ្ញាក់ផ្អេីលនៅតាមដងផ្លូវក្នុងភូមិសាស្ត្រស្រុកឧដុង្គ និងក្រុមក្មេងទំនើង ០៨នាក់ទៀត ត្រូវបានសមត្ថកិច្ចនគរបាលស្រុកសំរោងទងបង្ក្រាបនៅពេលក្រុមនេះ បង្កការអុកឡុកនៅក្នុងពិធីបុណ្យកឋិនទាន នៅវត្តឧត្តរមានជ័យ ក្នុងភូមិទឹកស្អុយ ឃុំទំព័រមាស ស្រុកសំរោងទង ខេត្តកំពង់ស្ពឺ។
សមត្ថកិច្ចបានបញ្ជាក់ក្នុងរបាយការណ៍ថា, ប្រតិបត្តិការទាំងពីរស្រុក សមត្ថកិច្ចចាប់យកវត្ថុតាងរួមមាន៖
-ដាវដែក ០៤
-កាំបិតផ្គាក់ ០១
-កូនកាំបិតចុងស្រួច ០១
សមត្ថកិច្ចបន្តថា, តាមការបញ្ជាក់ពីសមត្ថកិច្ចនៅអធិការដ្ឋាននគរបាលស្រុកទាំងពីរ ក្មេងទំនើងដែលបានឃាត់សរុប២១នាក់ ត្រូវបានកសាងសាវតានិងអនុវត្ដតាមគោលការណែនាំពីលោកស្នងការ អនុញ្ញាតិឱ្យធ្វើការអប់រំ និងអញ្ជេីញមាតាបិតា អាណាព្យាបាលមកទទួលយកទៅធ្វេីការអប់រំនិងធ្វេីកិច្ចសន្យាចំពោះមុខសមត្ថកិច្ច ដោយសន្យាថានិងមិនបន្ដប្រព្រឹត្ដសកម្មភាពដូចថៃ្ងនេះទៀត ករណីមិនរាងចាល ឬបញ្ឈប់សកម្មភាពគឺសមត្ថកិច្ចនិងបន្ដនីតិវិធី ចាត់ការផ្លូវច្បាប់៕
ដោយ ៖ សិលា
