សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តបែនដឹកខ្សាច់មួយគ្រឿងបានបុកម៉ូតូវីណូទៅបោកផ្ទប់នឹងបង្គោលភ្លេីងបណ្ដាលឱ្យមន្ត្រីនគរបាលម្នាក់ស្លាប់ភ្លាមៗនៅនឹងកន្លែងកាលពីវេលាម៉ោង១០និង២០នាទីយប់ថ្ងៃ ព្រហស្បតិ៍ ទី១១ ខែវិច្ឆិកា ឆ្នាំ២០២១ ស្ថិតនៅតាមបណ្ដោយផ្លូវ៦០ម៉ែត្រត្រង់ចំណុចជិតផ្លូវចូលផ្សារក្រមួន ក្នុងសង្កាត់ចាក់អង្រែក្រោម ខណ្ឌមានជ័យ ។
សពជនរងគ្រោះមានឈ្មោះ ស្រេង សំណាង ភេទប្រុស អាយុ៥១ឆ្នាំ មុខរបរជាមន្ត្រីនគរបាលមានឋានន្តរស័ក្ដិ អនុសេនីយ៍ឯក នាយរងផ្នែកថែរក្សា មានអាសយដ្ឋាន ភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្ដាល ។
បេីតាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តបែនដឹកខ្សាច់ពាក់ស្លាកលេខត្បូងឃ្មុំ3A-0858 បើកដោយបុរសម្នាក់ក្នុងទិសដៅពីត្បូងទៅជើងដោយល្បឿនលឿន។ ខណៈរថយន្តនេះបើកមកដល់ចំណុចកើតហេតុខាងលើបានជ្រុលទៅបុកម៉ូតូវីណូ ពណ៌សលាយផ្កាឈូក ពាក់ស្លាកលេខភ្នំពេញ1S-6793 បើកដោយមន្ត្រីនគរបាលម្នាក់ស្របទិសគ្នាពេញទំហឹងទៅបោកផ្ទប់នឹងបង្គោលភ្លើងបណ្ដាលឱ្យជនរងគ្រោះស្លាប់ភ្លាមៗ។ ចំណែករថយន្តបង្កព្យាយាមបើករត់ប្រមាណជាងមួយរយម៉ែត្រក៏ឈប់រថយន្តហើយរត់ចូលក្នុងព្រៃបាត់។
ក្រោយកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុ និងបានទាក់ទងបន្តទៅសមត្ថកិច្ចជំនាញចរាចរណ៍នៃស្នងការដ្ឋានរាជធានីភ្នំពេញមកធ្វេីការវាស់វែងយករថយន្តបង្កនិងម៉ូតូរងគ្រោះទៅរក្សាទុករង់ចាំដោះស្រាយតាមក្រោយ ។ ដោយឡែកសពជនរងគ្រោះត្រូវរថយន្តសាមុយដឹកយកទៅតម្កល់ទុកនៅវត្តទឹកថ្លារង់ចាំសាច់ញាតិមកទទួលសពយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
