រថយន្តដឹកកម្មករបុកក្មេងប្រុសជិះកង់បត់ឆ្វេងខ្វះការប្រុងប្រយ័ត្នរបួសធ្ងន់ស្រាល២នាក់

ខេត្តស្វាយរៀង៖ មានការភ្ញាក់ផ្អើលទាំងព្រឹក ដល់អ្នកភូមិនិងអ្នកធ្វើដំណើរបន្ទាប់ពីក្មេងប្រុសម្នាក់ជិះកង់បត់ឆ្វេងខ្វះការប្រុងប្រយ័ត្នត្រូវរថយន្តដឹកកម្មករបុកពីក្រោយស្របគ្នាពេញទំហឹង។

ហេតុការណ៍នេះបានកើតឡើងកាលពីវេលាម៉ោង៦និង១០នាទីព្រឹកថ្ងៃទី១ខែធ្នូឆ្នាំ២០២១ លើផ្លូវក្រាលកៅស៊ូ ត្រង់ចំណុចភូមិអង្គសាលា ឃុំចំបក់ ស្រុកស្វាយជ្រំ ខេត្តស្វាយរៀង ។

យោងតាមសមត្ថកិច្ចនគរបាលស្រុកបានឲ្យដឹងថាក្មេងប្រុសដែលរបួសធ្ងន់មានឈ្មោះ ប៉ាល់ លីសាល អាយុ ១០ឆ្នាំ មុខរបរ សិស្សរស់នៅភូមិអង្គសាលា ឃុំចំបក់ ស្រុកស្វាយជ្រំ ខេត្តស្វាយរៀង។

ចំណែកអ្នកបើករថយន្តរងរបួសស្រាលត្រូវបានស្គាល់ឈ្មោះ ពុត ប៊ុនធឿន អាយុ ៣៥ឆ្នាំ មុខរបរបើករថយន្ដដឹកកម្មកររោងចក្ររស់នៅភូមិកណ្ដាល ឃុំគ្រួស ស្រុកស្វាយជ្រំ ខេត្តស្វាយរៀង ។

តាមសាក្សីបានឱ្យដឹងថាមុនកើតហេតុមានក្មេងប្រុសម្នាក់បានជិះកង់មួយគ្រឿងក្នុងទិសដៅពីត្បូងទៅជើង លើផ្លូវក្រាលកៅស៊ូ ហើយក៏បត់ឆ្វេងខ្វះការប្រុងប្រយ័ត្នស្រាប់តែរថយន្តមួយគ្រឿងម៉ាក MitsuBisi ពណ៌ស ពាក់ស្លាកលេខភ្នំពេញ ៣C.៩២១៩ស្របទិសគ្នាជាន់ហ្វ្រ័ងមិនទាន់ក៏បុកប៉ះពេញទំហឹងបង្ក
ការភ្ញាក់ផ្អើលទាំងព្រឹក ដល់អ្នកភូមិនិងអ្នកធ្វើដំណើរនិងប្រញាប់ប្រញាលយកក្មេងរងគ្រោះបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង។

រឺឯមធ្យោបាយធ្វើដំណើរទាំង២គ្រឿងសមត្ថកិច្ចវាស់វែងនិងអូសយកមករក្សាទុកនៅអធិការដ្ឋាននគរបាលស្រុកស្វាយជ្រំ ដើម្បីដោះស្រាយគ្នាពេលក្រោយតាមច្បាប់៕

ដោយ៖យឹម សុថាន