សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអនុញ្ញាតឱ្យលោក ហ្សាក់ ពើឡេ (Jacques Pellet)ឯកអគ្គរដ្ឋទូតថ្មីប្រទេសបារំាង ប្រចំាកម្ពុជា ចូលជួបសម្តែងការគួរសមនាព្រឹកថ្ងៃទី ១៧ ខែធ្នូ ឆ្នាំ២០២១ នៅវិមានរដ្ឋសភា។
សម្តេចប្រធានរដ្ឋសភាបានស្វាគមន៍យ៉ាងកក់ក្តៅចំពោះលោកហ្សាក់ ពើឡេ ដែលត្រូវបានតែងតាំងជាឯកអគ្គរដ្ឋទូតប្រចាំនៅកម្ពុជា និងបានគូសបញ្ជាក់ថារដ្ឋសភាកម្ពុជាបានត្រៀមជាស្រេចនៅក្នុងការបង្កលក្ខណៈងាយស្រួល បង្កើនកិច្ចសហ ប្រតិបត្តិការដើម្បីឱ្យបេសកកម្មការទូតរបស់លោកទទួលបានជោគជ័យ។
សម្តេចអគ្គមហាពញាចក្រី ហេង សំរិន បានលើកឡើងថាកម្ពុជា-បារាំង បានកសាងទំនាក់ទំនង និងកិច្ចសហប្រតិបត្តិការរវាងគ្នា ជាយូរលង់ណាស់មកហើយ។ ទំនាក់ទំនង និងកិច្ចសហប្រតិបត្តិការដ៏ល្អនេះត្រូវបានបន្តពង្រឹង និង ពង្រីកជាលំដាប់រហូតមកទល់បច្ចុប្បន្ន។
សម្តេច សង្ឃឹមថា ក្នុងអាណត្តិការទូតរបស់ឯកឧត្តម នឹងបន្តរួមចំណែកពង្រឹងពង្រីក និងជំរុញលើកកម្ពស់កិច្ចសហប្រតិបត្តិការល្អ ដែលមានស្រាប់ ឱ្យកាន់តែប្រសើរឡើងថែមមួយកម្រិតទៀត។
លោក ហ្សាក់ ពើឡេ បានថ្លែងអំណរគុណជ្រាលជ្រៅចំពោះសម្តេចប្រធាន ដែលបានអនុញ្ញាតឱ្យលោកបានចូលជួបសម្តែងការគួរសមនាពេលនេះ។ ឯកឧត្តមបានកោតសរសើរនិងវាយតម្លៃខ្ពស់ការបើកប្រទេសកម្ពុជាឡើងវិញ ដោយសារយុទ្ធសាស្រ្តវ៉ាក់សំាង ដ៏ត្រឹមត្រូវរបស់រដ្ឋាភិបាល។
លោកឯកអគ្គរដ្ឋទូតបានគូសបញ្ជាក់ថា ការបើកប្រទេសរបស់ កម្ពុជាឡើងវិញ បានធ្វើឲ្យរដ្ឋសភាបារំាងនិងកម្ពុជាមានលទ្ធភាពនៅក្នុងការជំរុញនិងបង្កើនកិច្ចសហប្រតិបត្តិការដ៏ល្អជាមួយគ្នាបន្តទៀត នៅក្នុងនោះមានការផ្លាស់ប្តូរដំណើរទស្សនកិច្ចរវាងគ្នាទៅវិញទៅមកផង។
លោក ហ្សាក់ ពើឡេ បានសម្តែងការពេញចិត្តនិងអបអរសាទរចំពោះការប្រើប្រាស់ភាសាបារំាងនៅកម្ពុជា ក៏ដូចជានៅក្នុងរដ្ឋសភាកម្ពុជា។
ឯកអគ្គរដ្ឋទូតបានគូសបញ្ជាក់ថានៅពេលខាងមុខនេះ អគ្គលេខាធិការនៃអង្គការអន្តរជាតិហ្វ្រង់កូហ្វូនីនឹងមកបំពេញទស្សនកិច្ចនៅកម្ពុជាដែលជាឱកាសសំខាន់នៅក្នុងការពង្រឹងកិច្ចសហប្រតិបត្តិការរវាងសភាកម្ពុជាផងដែរ។
លោក ហ្សាក់ ពើឡេ បានជម្រាបសម្តេចប្រធានរដ្ឋសភាថាប្រទេសបារំាងនៅតែបន្តកិច្ចសហប្រតបត្តិការនិងផ្តល់ជំនួយអភិវឌ្ឍន៍ដល់កម្ពុជាទៅមុខទៀត៕
ដោយ៖ សូរិយា
