សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ យ៉ាងហោចណាស់ក៏មានមនុស្សម្នាក់បានស្លាប់នៅនឹងកន្លែងកើតហេតុភ្លាមៗនិង២នាក់ទៀតបានរងរបួសធ្ងន់នៅក្នុងឧបទ្ទវហេតុគ្រោះថ្នាក់ចរាចរណ៍ម៉ូតូបុកគ្នា។
ហេតុការណ៍នេះបានកើតឡើងនៅវេលាម៉ោង៤និង១៥នាទីទៀបភ្លឺ ថ្ងៃទី១៨ ខែឆ្នូ ២០២១ នៅលើផ្លូវលេខ១២៩E ក្នុងភូមិរលួស ឃុំធ្លាប្រជុំ ស្រុកកោះអណ្តែត តាកែវ ។ សមត្ថកិច្ចបានឱ្យដឹងថា ករណីគ្រោះថ្នាក់នេះបង្កឡើងរវាងម៉ូតូមួយគ្រឿងម៉ាកស៊ីរូស ពណ៌ខ្មៅ គ្មានស្លាកលេខបើកបរពីទិសខាងកើតមកលិចដោយឈ្មោះ ង៉ែត ញ៉ ភេទប្រុស អាយុ៤៣ឆ្នាំ មុខរបរកសិករ នៅភូមិកែវកាំភ្លើង ឃុំព្រៃខ្លា ស្រុកកោះអណ្តែត ខេត្តតាកែវ រងរបួសចំលើចិញ្ចើមស្តាំ និងជើងស្តាំ រីឯអ្នករួមដំណើរជាប្រពន្ធឈ្មោះ ឃួន ខាំ អាយុ៤៣ឆ្នាំ មានទីនៅជាមួយគ្នា រងរបួសធ្ងន់ អ្នកទាំងពីរត្រូវបានរថយន្តដឹកយកទៅសង្រ្គោះនៅមន្ទីរពេទ្យខេត្តតាកែវ ។ ចំណែកភាគីម្ខាងទៀតជិះម៉ូតូម៉ាកហុងដាឌ្រីម C១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ តាកែវ១K-០៣១១ ធ្វើដំណើរពីទិសខាងលិចទៅទិសខាងកើត បើកបរដោយឈ្មោះ ក្រោក ចិន ភេទប្រុស អាយុ៣៨ឆ្នាំ មុខរបរ កសិករ មានទីលំនៅភូមិរមេញខាងជើង ឃុំរមេញ ស្រុកកោះអណ្តែត ខេត្តតាកែវ បណ្តាលឱ្យស្លាប់នៅកន្លែងកើតហេតុតែម្តង ។
ក្រោយកើតហេតុ កម្លាំងជំនាញបានចុះធ្វើការវាស់វែង និងប្រគល់សាកសពឱ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែកវត្ថុតាងម៉ូតូទាំងពីរគ្រឿងត្រូវបានយកទៅរក្សាទុកនៅអធិការដ្ឋានស្រុកកោះអណ្តែត ៕
ដោយ៖ ស សម
