រថយន្តហាយឡេនឌ័រមួយគ្រឿងត្រូវរថភ្លើងបុករងការខូចខាតយ៉ាងដំណំ

ខេត្តតាកែវ ៖ រថយន្តហាយឡេនឌ័រមួយគ្រឿងបានរងការខូចខាតយ៉ាងដំណំតែសំណាងល្អមិនមានបណ្ដាលឱ្យនរណាម្នាក់រងគ្រោះថ្នាក់ដល់ជីវិតខណៈត្រូវបានរថភ្លើងបុក។

ហេតុការណ៍នេះបានកើតឡើងនៅថ្ងៃសៅរ៍១៣រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥​ ត្រូវនឹងថ្ងៃទី១ ខែមករាឆ្នាំ២០២២ វេលាម៉ោង០០និង១០នាទី ស្ថិតនៅលើផ្លូវលេខ២២ ចន្លោះគីឡូម៉ែត្រលេខ​៨-៩ក្នុងភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ ។

សមត្ថកិច្ចបានឲ្យដឹងថាដំបូងមានរថភ្លើងមួយខ្សែដែលបើកបរមកពីទិសខាងជើងលុះមកដល់ចំណុចខាងលើបានបុករថយន្តមួយគ្រឿងម៉ាកតូយ៉ូតាហាយឡែេឌ័រពណ៌ទឹកប្រាក់ ពាក់ស្លាកលេខ ភ្នំពេញ2AC.9725បើកបរដោយឈ្មោះ កែវ សុផល ភេទប្រុសអាយុ៦០ឆ្នាំមានទីលំនៅភូមិឃុំកើតហេតុខាងលើមុខរបរទាហ៊ាន ដែលបើកបរមកពីទិសខាងកើត រងរបួសស្រាល តើបណ្ដាលឲ្យរថយន្តរងការខូចខាតយ៉ាងដំណំ។ 

សមត្ថកិច្ចបានបញ្ជាក់ឲ្យដឹងទៀតថាក្រោយពេលកើតហេតុរថភ្លើងខាងលើមិនបានឈប់នៅកន្លែងកើតហេតុទេហើយបានបើកបរទៅទិសខាងត្បូងបាត់ទៅ ចំណែកជនរងគ្រោះបានយកទៅសង្គ្រោះនៅមន្ទីរពេទ្យឯកជន។

ចំណែកវត្ថុតាងរថយន្តដែលរងការខូចខាតធ្ងន់ត្រូវបានយកមករក្សាទុកនៅអធិការដ្ឋាននគរបាលស្រុកត្រាំកក់ដើម្បីទុកឲ្យកម្លាំងជំនាញកសាងសំណុំរឿងទៅតាមនីតិវិធី៕

ដោយ៖ ស សម