សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ យ៉ាងហោចមានមនុស្សម្នាក់បានស្លាប់ភ្លាមៗនៅនឹងកន្លែង ពីរនាក់ទៀតរងរបួសធ្ងន់ ឯម៉ូតូ១គ្រឿងនិងរថយន្តមួយគ្រឿងខូចខាតជាដំណំក្នុងឧបទ្ទវហេតុគ្រោះថ្នាក់ចរាចរណ៍រថយន្តបុកម៉ូតូ។
ឧបទ្ទវហេតុនេះកើតឡើងកាលពីវេលាម៉ោង៩យប់ថ្ងៃទី៤ ខែមករា ឆ្នាំ២០២២ នៅលើផ្លូវលេខ ១០៥ (រង្វង់មូលផ្លែស្ពឺ) ត្រង់ចំណុចភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។
មន្រ្តី្តនគរបាលចរាចរណ៍ក្រុងច្បាមនបានឲ្យដឹងថា មុនពេលកើតហេតុគេឃើញរថយន្តមួយគ្រឿង ម៉ាកតូយ៉ូតាតាកូម៉ា ពាក់ស្លាកលេខ ភ្នំពេញ ២BA-១៦៥៥ បើកបរដោយឈ្មោះ ហេង គៀត ភេទប្រុស អាយុ ៦៥ឆ្នាំ រស់នៅភូមិពងទឹក ឃុំវល្លិ៍សរ ស្រុកសំរោងទង ខេត្តកំពង់ស្ពឺ ធ្វើដំណើរពីទិសខាងកើត ទៅទិសខាងលិច។លុះ មកដល់ចំណុចខាងលើបានបុកម៉ូតូ មួយគ្រឿងម៉ាកហុងដាស្គូពី ពណ៌ក្រហម ពាក់ស្លាកលេខ ភ្នំពេញ ១CT-៤០២៧ ដែលធ្វើដំណើរស្របទិសគ្នា។ ម៉ូតូនេះបើកបរដោយឈ្មោះ ឈុន លីដា ភេទស្រី អាយុ ៣៦ឆ្នាំ (របួសធ្ងន់) ឌុបមនុស្សចំនួន ០២នាក់ គឺ១.ឈ្មោះ អ៊ុន ពុទ្ធារ៉ា ភេទស្រី អាយុ ៣២ឆ្នាំ (របួសធ្ងន់) និង២.ឈ្មោះ វ៉ាត់ គីមហុង ភេទស្រី អាយុ ១០ឆ្នាំ (ស្លាប់)។ ទាំងបីនាក់រស់នៅភូមិញរ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ។
សាក្សីឃើញឧបទ្ទវហេតុនេះបានឲ្យដឹងថាបន្ទាប់បុកម៉ូតូរួចរថយន្តនោះមិនទាន់អស់ល្បឿនទេ ហើយបានជ្រុលចង្កូតទៅបុករបងផ្ទះ របស់ឈ្មោះ ហុង ហៀង ភេទស្រី អាយុ ៥០ឆ្នាំ នៅភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ខូចខាតយ៉ាងដំណំ ។ បន្ទាប់មកអ្នកបើកបររថយន្តទុករថយន្តចោលហើយគេចខ្លួនបាត់។
ប្រភពដដែលបានឲ្យឲ្យដឹងទៀតថា ក្រោយកើតហេតុ កម្លាំងនគរបាលជំនាញបានចុះទៅដល់ធ្វើការវាស់វែងយកយានយន្តទាំងពីរគ្រឿងទៅរក្សាទុកនៅអធិការដ្ឋាននគរបាលក្រុងច្បារមនរួចហៅរថយន្តសាមុយដឹកជនរងគ្រោះយកទៅសង្គ្រោះនៅឯមន្ទីរពេទ្យបង្អែកខេត្តកំពង់ស្ពឺ និង សពក្មេងស្រីត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
ដោយ ៖ ប្រាថ្នា
