សារព័ត៌មាន នគរវត្ត តែងតែនាំមុខគេជានិច្ច
ក្លិបបិសាចក្រហម Manchester United ប្តេជ្ញាចុះហត្ថលេខាលើកីឡាករRuben Neves នៅក្នុងខែមករានេះ។ ខ្សែបម្រើ Neves វ័យ២៤ឆ្នាំរបស់ Wolves នៅសល់រយៈពេល២ឆ្នាំទៀតលើកិច្ចសន្យាបច្ចុប្បន្នរបស់គាត់នៅទឹកដី Molineux ប៉ុន្តែគាត់បាននិយាយអំពីបំណងប្រាថ្នារបស់គាត់ក្នុងការលេងនៅ Champions League រដូវកាលក្រោយ។
ក្លិប Man Utd បានកំពុងពិចារណាលើការដេញថ្លៃដ៏មានសក្តានុពលមួយសម្រាប់កីឡាករអន្តរជាតិព័រទុយហ្គាល់រូបនេះចាប់តាំងពីរដូវក្តៅជាមួយនឹងអតីតអ្នកចាត់ការលោក Ole Gunnar Solskjaer ដែលជាអ្នកគាំទ្រ។ ក្លិបអាចផ្តល់សំណើប្រហែល៣៥លានផោនដើម្បីទាក់ទាញ Neves មកកាន់ទឹកដី Old Trafford ។
ទោះជាយ៉ាងណាក៏ដោយក្លិប Wolves ត្រូវបានគេជឿថា ត្រូវការការផ្តល់ជូនលើសពី៤០លានផោនសម្រាប់តារាឆ្នើមរបស់ពួកគេ ដែលបានទាក់ទាញចំណាប់អារម្មណ៍ពីក្លិប Arsenal ផងដែរកាលពីអតីតកាល។Neves សប្បាយចិត្តនៅ Wolves ប៉ុន្តែទំនងជាមិនចុះហត្ថលេខាលើកិច្ចព្រមព្រៀងរបស់គាត់ទេ ខណៈដែលគាត់សម្លឹងមើលដំណាក់កាលបន្ទាប់ក្នុងការអភិវឌ្ឍន៍ខ្លួនទៅក្លិបធំៗ។
គ្រូបង្វឹកបណ្ដោះអាសន្នរបស់ Manchester United លោក Ralf Rangnick កំពុងស្វែងរកខ្សែបម្រើថ្មី បន្ទាប់ពីមានទម្រង់លេងមិនល្អរបស់Scott McTominay, Nemanja Matic និង Fred ចាប់តាំងពីគាត់មកដល់។
គ្រូបង្វឹកសញ្ជាតិអាឡឺម៉ង់រូបនេះមានកៅអីជួរមុខដើម្បីមើលពីសមត្ថភាពរបស់ Neves ខណៈដែល Wolves បានទទួលជ័យជម្នះ ១-០ លើក្រុម United នៅកីឡដ្ឋាន Old Trafford កាលពីថ្ងៃចន្ទ។ មានការព្រួយបារម្ភមួយចំនួនដែលលោក Rangnick ចង់ចុះហត្ថលេខាលើខ្សែបម្រើម្នាក់ពី Bundesliga ដែលជាផ្នែកដែលគាត់ស្គាល់ច្បាស់ និងជឿជាក់។
លោក Bruno Lage ដែលជាអ្នកចាត់ការទូទៅរបស់ក្លិប Wolves បានបង្ហាញក្តីអស់សង្ឃឹមក្នុងការរក្សា Neves តទៅទៀត។ លោក Lage បាននិយាយថា “វាមិនមែនអំពីកិច្ចសន្យា ឬលុយទេ វានិយាយអំពីការបង្កើតក្រុមធំមួយ ដែលប្រយុទ្ធដើម្បីជោគជ័យ។ Ruben Neves ស្ថិតនៅក្នុងកន្លែងដែលគាត់ត្រូវការការប្រកួតប្រជែងផ្សេង ហើយយើងក៏ចង់បានការប្រកួតប្រជែងផ្សេងសម្រាប់ក្លិបផងដែរ។ យើងចង់ជំរុញយុវជនដូចជា Ruben Neves ទៅកាន់កម្រិតកំពូល”។
នៅពេលសួរអំពីអនាគតកាលពីខែធ្នូ ខ្សែបម្រើរូបនេះបាននិយាយថា “អនាគតនឹងត្រូវបានគេមើលឃើញក្នុងពេលឆាប់ៗនេះ។ ខ្ញុំចូលចិត្តរស់នៅក្នុងបច្ចុប្បន្ន ខ្ញុំសប្បាយចិត្ត ខ្ញុំមានអារម្មណ៍អស្ចារ្យនៅ Wolves ហើយខ្ញុំនឹងផ្តោតលើទីនេះ ព្រោះប្រសិនបើខ្ញុំធ្វើរឿងត្រឹមត្រូវខ្ញុំប្រាកដថាអនាគតនឹងភ្លឺស្វាង”។
សូមជម្រាបថា ខ្សែបម្រើ Ruben Neves បានចុះហត្ថលេខាជាមួយក្រុមWolves ក្រោយពីចាកចេញពីក្លិប Porto នៅរដូវក្តៅឆ្នាំ២០១៧ ហើយបានក្លាយជាកីឡាករសំខាន់នៅក្នុងក្រុមដែលបានឡើងទៅក្របខ័ណ្ឌ Premier League មួយឆ្នាំក្រោយមកមុនពេលមានកៅអីទៅប្រកួតក្នុងពានរង្វាន់ Europa League ៕
ដោយ៖ ភារៈ(រូបភាព ៖ thesun.com)
