សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់ក៏មានមនុស្សម្នាក់ស្លាប់និង២នាក់ទៀតរងរបួសដែរដោយសារតែករណីគ្រោះថ្នាក់ចរាចរណ៍រវាងម៉ូតូម៉ាកស៊ុយហ៊្សុយគីនិចដែលបើកឆ្លងកាត់ថ្នល់ខ្វះការប្រុងប្រយ័ត្ន ទៅបុកជាមួយម៉ូតូម៉ាកហុងដាឌ្រីម សេ១២៥ ដែលបើកបញ្ច្រាសទិសគ្នាយ៉ាងពេញទំហឹងបណ្ដាលឱ្យដួលរដូករណែលពេញផ្លូវ បង្កការភ្ញាក់ផ្អើលដល់អ្នកភូមិទាំងយប់។
ហេតុការណ៍នេះបានកើតឡើងកាលពីវេលាម៉ោង៩និង៣៩នាទីយប់ថ្ងៃទី១៦ ខែ មករា ឆ្នាំ២០២២ នៅលើផ្លូវជាតិលេខ១ ចន្លោះគឺឡូម៉ែត្រលេខ ១៤៨-១៤៩ ស្ថិតក្នុងភូមិជ្រៃធំ សង្កាត់ព្រៃអង្គញ់ ក្រុងបាវិត ខេត្តស្វាយរៀង។
សមត្ថកិច្ចនគរបាលក្រុងបានឱ្យដឹងថាបុរសដែលស្លាប់មានឈ្មោះនួន សុខា អាយុ២៥ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅភូមិត្រពាំងធំ ឃុំអង្គរស ស្រុកមេសាង ខេត្តព្រៃវៃង ជិះម៉ូតូម៉ាកស៊ុយហ៊្សុយគីនិច ពណ៌ស ពាក់ស្លាកលេខ ស្វាយរៀង ១O-៣៩៧៨។
ចំណែកភាគីរងគ្រោះមានឈ្មោះ គិ ហី ភេទប្រុស អាយុ២៥ឆ្នាំ ជនជាតិខ្មែរ មុខរបរកងយោធពលខេមរភូមិន្ទ(កងវិស្វកម្ម) មានទីលំនៅភូមិរកាខ្នុរ ឃុំរកាខ្នុរ ស្រុកក្រូចឆ្មារ ខេត្តត្បូងឃ្មុំ និងមានអ្នករួមដំណើរម្នាក់ឈ្មោះ ហាន សីហោះ ភេទ ប្រុស អាយុ២០ឆ្នាំ ជនជាតិខ្មែរ មុខរបរកងវិស្វកម្ម មានទីលំនៅភូមិដូនស្វាយ ឃុំសំរោងយារ ស្រុកពួក ខេត្តសៀមរាប ជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ ១B-៩១៨៥។
តាមសាក្សីបានឱ្យដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាកស៊ុយហ៊្សុយគីនិច ពណ៌ស ពាក់ស្លាកលេខ ស្វាយរៀង ១O-៣៩៧៨ នៅលើផ្លូវជាតិលេខ១ ហើយបានបើកឆ្លងកាត់ថ្នល់ពីកើតទៅលិចខ្វះការប្រុងប្រយ័ត្នបានជ្រុលទៅបុកជាមួយម៉ូតូមួយគ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ១B-៩១៨៥ ជិះគ្នា២នាក់ក្នុងទិសដៅពីលិចទៅកើត បញ្ច្រាសគ្នាយ៉ាងពេញទំហឹងបណ្ដាលឱ្យដួលរដូករណែលពេញផ្លូវបង្កការភ្ញាក់ផ្អើលដល់អ្នកភូមិទាំងយប់។
សពក្រោយកើតហេតុសមត្ថកិច្ចបានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី រីឯអ្នករងរបួសកំពុងសម្រាកព្យាបាលនៅមន្ទីរពេទ្យបង្អែកជីភូ។ ចំណែកមធ្យោបាយធ្វើដំណើរទាំង២គ្រឿងសមត្ថកិច្ចធ្វើការវាស់វែងនិងអូសយកទៅរក្សាទុកនៅប៉ុស្តិ៍នគរបាលរដ្ឋបាលព្រៃអង្គញ់ដើម្បីដោះស្រាយនៅពេលក្រោយតាមច្បាប់៕
ដោយ៖ យឹម សុថាន
