សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ ឧបករណ៍បទល្មើសនេសាទប្រភេទអាំងវិចទ័រឆក់ត្រី របស់ប្រជាពលរដ្ឋនៅក្នុងស្រុកកំពង់លែង ចំនួន១៩២គ្រឿង ត្រូវបានស្ម័គចិត្តប្រគល់ជូនសមត្ថកិច្ចនគរបាលប៉ុស្តិ៍តាមមូលដ្ឋានរបស់ខ្លួន នេះបើតាមការបញ្ជាក់របស់ លោក ប៉ាល់ ជឿន អធិការនៃអធិការដ្ឋាននគរបាលស្រុកកំពង់លែង កាលពីថ្ងៃទី១០ ខែកុម្ភៈ ឆ្នាំ២០២២ ។
លោកអធិការបានប្រាប់ថា កន្លងមកនេះនៅតាមវេទិការសាធារណៈនានា ក៏ដូចជានៅតាមប៉ុស្តិ៍នគរបាល ក្នុងស្រុកកំពង់លែង បានធ្វើការផ្សព្វផ្សាយ ផលប៉ះពាល់នៃការប្រើប្រាស់ឧបករណ៍បទល្មើសនេសាទ ដែលបង្កឱ្យបាត់បង់នូវធនធានធម្មជាតិ ។ ព្រមទាំងប្រឈមនឹងការអនុវត្តផ្លូវច្បាប់រាល់ការប្រើប្រាស់ឧបករណ៍នេសាទ ប្រភេទអាំងវិចទ័រឆក់ត្រី ។ ដោយមានការយល់ដឹងអំពីការផ្សព្វផ្សាយនេះ ប្រជាពលរដ្ឋបាននៅក្នុងភូមិសាស្រ្តស្រុកកំពង់លែង បានស្ម័គ្រចិត្តនាំយកអាំងវិចទ័រឆក់ត្រីដែលជាបទល្មើសនេសាទមួយបានបំផ្លាញនូវធនធានធម្មជាតិខ្លាំង យកមកប្រគល់ឱ្យសមត្ថកិច្ច ។
លោក ប៉ាល់ ជឿន អធិការនគរបាលស្រុកកំពង់លែងបានឱ្យដឹងថា កន្លងមកនេះអាជ្ញាធរខេត្ត និង លោកស្នងការដ្ឋាននគរបាលខេត្ត ក៏បានដាក់ចេញនូវបទបញ្ជាដល់កងកម្លាំងនគរបាលនៅតាមបណ្តាលមូលដ្ឋានទាំងអស់ធ្វើការផ្សព្វផ្សាយ និង ហាមឃាត់ចំពោះការប្រើប្រាស់ឧបករណ៍បទល្មើសនេសាទដោយខុសច្បាប់ និង ឱ្យប្រជាពលរដ្ឋដែលមានឧបករណ៍នេសាទខុសច្បាប់ប្រភេទអាំងវិចទ័រឆក់ត្រីយកមកប្រគល់ដល់សមត្ថកិច្ចរបស់ខ្លួននៅតាមមូលដ្ឋានដើម្បីចូលរួមទប់ស្កាត់និងបញ្ឈប់រាល់ការប្រើប្រាស់ឧបករណ៍ នេសាទខុសច្បាប់ ។ ដោយមានកិច្ចសហការជាមួយអាជ្ញាធរភូមិឃុំ និងសមត្ថកិច្ចជលផល និងការយល់ច្បាស់ពីប្រជាពលរដ្ឋដែលមានឧបករណ៍បទល្មើសនេសាទខុសច្បាប់ ប្រជាពលរដ្ឋបាន ប្រគល់ជូនឧបករណ៍ អាំងវិចទ័រឆក់ត្រីដល់សមត្ថកិច្ចដើម្បីដុតបំផ្លាញចោលតែម្តង ៕
ដោយ ៖ ចន្ថា
