សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ សមត្ថកិច្ចនគរបាលជំនាញព្រហ្មទណ្ឌបានសហការគ្នាបង្រ្កាបបុរសដៃដល់ម្នាក់ ខណៈដែលគេអះអាងថាបានវាយប្រពន្ធចំនួន២ដៃ ហើយបានស្លាប់នៅពេលដែលបញ្ជូនទៅសង្រ្គោះ នៅមន្ទីរពេទ្យបង្អែកស្រុកភ្នំក្រវាញ។
តាមការបញ្ជាក់ពីលោកឧត្ដមសេនីយ៍ត្រី ស្នងការរងទទួលផែនការងារព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ នាព្រឹកថ្ងៃព្រហស្បតិ៍ ៨រោច ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១០ ខែមីនា ឆ្នាំ២០២២ នេះថា បុរសសង្ស័យជាប្ដីត្រូវបាននាំខ្លួនយកមកសួរនាំ ឈ្មោះ សារ៉ូ វុធ ភេទប្រុស អាយុ៥៥ឆ្នាំ ជនជាតិខ្មែរ បច្ចុប្បន្ន មានទីលំនៅ ភូមិវាលវង់ ឃុំរកាត ស្រុកភ្នំក្រវាញ ខេត្តពោធិ៍សាត់ ។
លោកបញ្ជាក់ទៀតថា ការនាំខ្លួនជនសង្ស័យយកមកសួរនាំខាងលើ ពាក់ព័ន្ធករណីហិង្សាមានស្ថានទម្ងន់ទោស(មរណភាព)ខណៈប៉ុន្មានថ្ងៃមុនជនសង្ស័យជាប្តី(សារ៉ូ វុធ)បានវាយប្រពន្ធចំនួន២ដៃចំឆ្អឹងជំនីរខាងឆ្វេង បណ្ដាលឱ្យចុករួចបញ្ជូនទៅសង្រ្គោះនៅមន្ទីរពេទ្យបង្អែកស្រុកភ្នំក្រវាញតែបានស្លាប់ ។ ស្រ្តីជាប្រពន្ធ(ស្លាប់)ឈ្មោះ មាន ហួយ អាយុ ៦០ឆ្នាំ ជនជាតិខ្មែរ រស់នៅភូមិ.ឃុំកើតហេតុ ។
លោកបញ្ជាក់បន្ថែមទៀតថា បុរសសង្ស័យជាប្ដី និងស្រ្តីជាប្រពន្ធ(ស្លាប់)ចូលចិត្តផឹកស្រាជាប្រចាំដូចគ្នា។ ករណីខាងលើនេះ សមត្ថកិច្ចនគរបាលជំនាញ និងមន្រ្តីស្ថាប័នពាក់ព័ន្ធ សហការពិនិត្យ និងធ្វើការស្រាវជ្រាវយ៉ាងយកចិត្តទុកដាក់ ថែមទាំងធ្វើកំណត់ហេតុរួមមតិគ្នាផងដែរ ៕
ដោយ៖ បុឹម ពិន
