សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់រួមដំណេីរជាមួយបុរសម្នាក់ទៀតបានបេីករថយន្តក្នុងល្បឿនយ៉ាងលឿនធ្វើឱ្យរេចង្កូតទៅបុករថយន្តកុងតឺន័រពីក្រោយរួចបន្តទៅបុកម៉ូតូវីវ៉ាមួយគ្រឿងហើយរថយន្តបង្កនៅមិនទាន់អស់ល្បឿនក៏បន្តទៅបុកបង្គោលភ្លេីងមួយដេីមទៀតរងការខូចខាតយ៉ាងដំណំ។
ហេតុការណ៍នេះបានកេីតឡេីងកាលពីវេលាម៉ោង១០និង៣០នាទីយប់ ថ្ងៃទី១៧ ខែមីនា ឆ្នាំ២០២២ នៅចំណុចមុខធនាគារABA តាមបណ្តោយផ្លូវចោមចៅ ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ ។
តាមសាក្សីនៅកន្លែងកេីតហេតុបានឱ្យដឹងថា មុនពេលកេីតហេតុគេបានឃេីញរថយន្តម៉ាកKIA ពណ៌ទឹកប្រាក់ ពាក់ស្លាកលេខភ្នំពេញ2AG-9574 បេីកបរដោយបុរសម្នាក់រួមដំណេីរជាមួយបុរសម្នាក់ទៀតធ្វេីដំណេីរតាមបណ្តោយផ្លូវចោមចៅក្នុងល្បឿនលឿន លុះមកដល់ចំណុចកេីតហេតុស្រាប់តែបុករថយន្តកុងតឺន័រពីក្រោយហេីយបានរេចង្កូតមកខាងស្តាំដៃក៏បន្តទៅបុកម៉ូតូវីវ៉ាពណ៌ខ្មៅពាក់ស្លាកលេខភ្នំពេញ1AY-2480 ដែលកំពុងឈប់នៅចិញ្ចេីមផ្លូវបណ្តាលឱ្យរងការខូចខាតយ៉ាងដំណំ ហេីយរថយន្តបង្កនៅមិនទាន់អស់ល្បឿនបានបន្តទៅបុកបង្គោលភ្លើងថ្មមួយដើមបាក់ជាពីរកំណាត់ ឯរថយន្តខូចខ្ទេចផ្នែកខាងមុខទាំងស្រុង និងបណ្ដាលឱ្យអ្នកបើកបររងរបួសធ្ងន់ចំណែកអ្នករួមដំណើររងរបួសស្រាល។បន្ទាប់មករថយន្តសង្គ្រោះបន្ទាន់បានមកដឹកជនរងគ្រោះយកទៅសង្គ្រោះនៅឯមន្ទីរពេទ្យភ្លាមៗ។
ក្រោយកើតហេតុសមត្ថកិច្ចមូលដ្ឋានបានចុះមកដល់ហើយបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាតាមផ្លូវច្បាប់៕
ដោយ៖សុខាសែនជ័យ
