សារព័ត៌មាន នគរវត្ត តែងតែនាំមុខគេជានិច្ច
Gareth Bale គ្រោងនឹងចាកចេញពីក្លិប Real Madrid នៅចុងបញ្ចប់នៃរដូវកាល ២០២១-២០២២ នៅពេលដែលកិច្ចសន្យារបស់គាត់ផុតកំណត់ ដូច្នេះគាត់នឹងចាប់ផ្តើមស្វែងរកក្លិបថ្មី។ កីឡាករសញ្ជាតិវែលរូបនេះប្រហែលជាបានរកឃើញក្លិបមួយនៅក្នុងលីគកំពូលរបស់អាមេរិក Major League Soccer គឺក្លិប DC United ដែលចាប់អារម្មណ៍រូបគាត់។
ចំណាប់អារម្មណ៍របស់ក្លិបនៅលីគកំពូលអាមេរិកគឺល្មមដែលក្រុមអាមេរិកកំពុងពិភាក្សាជាមួយអ្នកតំណាងរបស់ Bale រួចហើយ។ បើតាមលោក Steven Goff របស់កាសែត Washington Post ដែលបានលាតត្រដាងថា ភាគីទាំងពីរបាននិយាយកាលពីខែមុន ហើយឥឡូវកំពុងផ្លាស់ប្តូរសំណើហើយ។
ប្រសិនបើ Bale ផ្លាស់ទៅ DC United គាត់នឹងរកបានច្រើនជាង Wayne Rooney បានធ្វើនៅពេលគាត់ចូលរួមក្រុមក្នុងឆ្នាំ២០១៨។ ជាមួយនឹង Rooney បានស៊ុតបញ្ចូលទី២៣គ្រាប់ក្នុងការបង្ហាញខ្លួន៤៨ប្រកួត ក្លិប DC United សប្បាយចិត្តជាមួយនឹងបទពិសោធន៍ជាមួយកីឡាករអឺរ៉ុបចាស់ៗហើយពួកគេចង់ធ្វើដូចនេះឡើងវិញ។
សូមបញ្ជាក់ថា ខ្សែប្រយុទ្ធ Gareth Bale បានចាកចេញពីក្លិបមាន់ខ្នាយមាស Tottenham កាលពីឆ្នាំ២០១៣ ទៅកាន់ក្លិប Real Madrid នៅក្លិបយក្សអេស្ប៉ាញមួយនេះគាត់រកបាន៨១គ្រាប់ក្នុងការបង្ហាញខ្លួន១៧៦ប្រកួត។ បន្ទាប់មកក្លិបមាន់ខ្នាយមាសក៏ខ្ចីជើងកីឡាករូបនេះវិញនៅឆ្នាំ២០២០-២០២១ ដោយរកបាន១១គ្រាប់ក្នុង២០ប្រកួតឲ្យក្លិបចាស់របស់ខ្លួន។ សម្រាប់ក្នុងក្រុមជម្រើសជាតិវែលវិញ ខ្សែប្រយុទ្ធរូបនេះរកបាន៣៨គ្រាប់ ក្នុងការបង្ហាញខ្លួន១០២ប្រកួត ៕
ដោយ៖ ភារៈ(រូបភាព ៖ MARCA)
