សារព័ត៌មាន នគរវត្ត តែងតែនាំមុខគេជានិច្ច
ខ្សែបម្រើសញ្ជាតិក្រូអាត Luka Modric បានយល់ព្រមបន្តកុងត្រារយៈពេលមួយឆ្នាំជាមួយក្លិបអធិរាជស Real Madrid។ កិច្ចសន្យាថ្មីបានរក្សា Modric នៅកីឡដ្ឋាន Santiago Bernabeu បន្តទៀតរហូតដល់ខែមិថុនា ឆ្នាំ២០២៣។
កីឡាករវ័យ៣៦ឆ្នាំដែលបានឈ្នះពានរង្វាន់ Ballon d’Or ក្នុងឆ្នាំ២០១៨រូបនេះបានចូលរួមពី Tottenham ក្នុងឆ្នាំ២០១២ ហើយបានបង្ហាញខ្លួន៤៣៦លើកសម្រាប់ Real Madrid ។
ជាសមាជិកមួយរូបដែលបានឈ្នះជើងឯករង World Cup ជាមួយក្រូអាតក្នុងឆ្នាំ២០១៨ កីឡាករ Modric បានជួយក្រុម Real Madrid ឈ្នះជើងឯក La Liga ៣ដង និងពានរង្វាន់ Champions League ៥ដង ។
គាត់បានបង្ហាញខ្លួនចំនួន២៨ដង ខណៈដែលក្រុមរបស់លោក Carlo Ancelotti បានឈ្នះពានរង្វាន់លីកនៅរដូវកាលនេះ ហើយគាត់បានលេងចំនួន១៣ដងនៅទ្វីបអឺរ៉ុប ដែល Real Madrid បានឈ្នះពានរង្វាន់ Champions League ជាលើកទី១៤របស់ពួកគេកាលពីខែមុន។
គួរបញ្ជាក់ថា នៅពេលដែល Modric ឈ្នះពាន Ballon d’Or ឆ្នាំ២០១៨គាត់បានក្លាយជាកីឡាករដំបូងគេក្រៅពី Lionel Messi ឬ Cristiano Ronaldo ដែលបានឈ្នះពានរង្វាន់នេះក្នុងរយៈពេលជាង១ទសវត្សរ៍ ៕
ដោយ៖ ភារៈ(រូបភាព ៖ BBC Sport)
