សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បេីតាមការបញ្ជាក់ពីអាជ្ញាធររដ្ឋធានីគែរ (Cairo) បានឱ្យដឹងថា៖ យ៉ាងហោចណាស់ក៏មានមនុស្សចំនួន៦នាក់បានស្លាប់ ក្នុងករណីបាក់រលំអគារនៅក្នុងរដ្ឋធានីគែរ (Cairo) នៃប្រទេសអេហ្ស៊ីប កាលពីថ្ងៃសុក្រទី១៧ ខែមិថុនាម្សិលមិញនេះ។
បន្ទាប់ពីកេីតហេតុ លោក Ibrahim Abdel-Hadi អភិបាលរងក្រុង បាននិយាយនៅក្នុងសេចក្តីថ្លែងការណ៍ដែលចេញផ្សាយដោយក្រសួងមហាផ្ទៃថា៖ គ្រួសារមួយមានសមាជិក៦នាក់ត្រូវគេជឿថាបានស្ថិតនៅខាងក្នុងអគារកម្ពស់៦ជាន់ដែលបាក់រលំមួយនេះ។
ភ្លាមៗក្រុមអ្នកជួយសង្គ្រោះនៅកន្លែងកើតហេតុបានបន្តស្វែងរកអ្នកបាត់ខ្លួននៅតាមគំនរបាក់បែក និងបានស្នេីសុំឱ្យប្រជាជនរស់នៅតំបន់ជុំវិញចាកចេញពីអគារនោះ ដោយសារតែមានការព្រួយបារម្ភអំពីរចនាសម្ព័ន្ធ។ ចំណែកក្រុមអ្នកឈូសឆាយ និងអ្នកជីករកបន្តលើកបំណែកបាក់បែកចេញពីកន្លែងកើតហេតុកាលពីរសៀលថ្ងៃសុក្រផងដែរ។ ប៉ុន្តែគេនៅមិនទាន់បានដឹងភ្លាមៗនៅឡើយនោះទេពីមូលហេតុដែលបណ្តាលឱ្យបាក់រលំអគារនេះ។
សូមជម្រាបថា ការបាក់រលំអគារគឺជារឿងធម្មតាទៅហើយនៅក្នុងប្រទេសអេហ្ស៊ីប ព្រោះតែសំណង់មិនសមស្រប និងកង្វះការថែទាំនៅក្នុងសង្កាត់ក្រីក្រ និងតំបន់ជនបទ។
គួរបញ្ជាក់ដែរថា បច្ចុប្បន្នរដ្ឋាភិបាលរបស់ប្រទេសអេហ្ស៊ីប បានព្យាយាមបង្ក្រាបលើសំណង់ខុសច្បាប់ក្នុងរយៈពេលប៉ុន្មានឆ្នាំថ្មីៗនេះបន្ទាប់ពីការអនុវត្តច្បាប់មានភាពធូររលុង៕
ដោយ៖ស តារា
