សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ បេីយោងតាមប្រភពព័ត៌មានពីរបាយការណ៍របស់អគ្គស្នងការនគរបាលជាតិ បានឱ្យដឹងនៅរសៀលថ្ងៃអាទិត្យទី១៩ ខែមិថុនា ឆ្នាំ២០២២នេះថា កម្លាំងសមត្ថកិច្ចចម្រុះ ចុះបង្ក្រាបបទល្មើសនេសាទខុសច្បាប់ក្នុងភូមិសាស្ត្រស្រុកឯកភ្នំ ជាក់ស្ដែងដកហូតនិងរឹបអូសបានវត្ថុតាងរួមមាន៖ ក្បាលបចំនួន ៤៣គ្រឿង, របាំងសាច់អួនប្រវែង ៨២០០ម៉ែត្រ, បង្គោលចំនួន ៣៣០០ដើម, មងមីជាន់ប្រវែង ៥០០ម៉ែត្រ, ប្រលែងត្រីចំរុះចំនួន ១៥០គីឡូក្រាម ។
របាយការណ៍ដដែល បន្តថា អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង និងយោបល់លោកឧត្តមសេនីយ៍ត្រី ចេង ឡេង ស្នងការរងផែនការងារប្រឆាំងបទល្មើសសេដ្ឋកិច្ច លោកវរសេនីយ៍ឯក ឡុង យោធាវីរៈ កាលពីថ្ងៃទី១៨ ខែមិថុនាម្សិលមិញនេះ បានដឹកកម្លាំងប៉ុស្តិ៍នគរបាលរដ្ឋបាលកោះជីវាំង នៃអធិការដ្ឋាននគរបាលស្រុក សហការជាមួយកម្លាំងចំរុះ និងទីបញ្ជាការស្រាលខេត្តបាត់ដំបង បានចុះបង្ក្រាបបទល្មើសនេសាទ ០១លើក នៅចំណុចអតីតឡូតិ៍នេសាទ១ និងលេខ២ ក្នុងភូមិសាស្ត្រភូមិព្រែកទាល់ និងភូមិក្បាលតោល ឃុំកោះជីវាំង ស្រុកឯកភ្នំ។
ក្រោយពេលបង្ក្រាបសម្ភារៈល្មើសខាងលើនេះ ត្រូវបានក្រុមការងារសម្រេចដុតបំផ្លាញចោលនៅកន្លែងតែម្តង។ ចំពោះមុខសញ្ញាដែលជាម្ចាស់ទីតាំងប្រព្រឹត្តអំពើល្មើសច្បាប់នេះ សមត្ថកិច្ចនគរបាលកំពុងធ្វើការស្រាវជ្រាវសាវតាជាតិ ដើម្បីរៀបចំសំណុំរឿងបញ្ជូនទៅសាលាដំបូងខេត្តបាត់ដំបង អនុវត្តតាមច្បាប់ ៕
ដោយ៖សហការី
