ខណៈទឹកភ្លៀងបន្តធ្លាក់ស្ទើររាល់ថ្ងៃ បណ្ដាលឱ្យជន់លិចក្រុងកំពង់ឆ្នាំង, រដ្ឋបាលក្រុងចុះត្រួតពិនិត្យដើម្បីរំដោះទឹកភ្លៀង

ចែករំលែក៖

ខេត្តកំពង់ឆ្នាំង៖ លោកយិន សាវ៉េន អភិបាលក្រុងកំពង់ឆ្នាំង រួមដំណើរជាមួយមន្ត្រីមួយចំនួន នៅថ្ងៃទី១៨ ខែកក្កដា ឆ្នាំ២០២២នេះ បានចុះពិនិត្យមើលទីកន្លែង មួយចំនួនដែលរងជំនន់ទឹកភ្លៀងជន់លិច និងការស្តារដាក់លូដើម្បីរំដោះទឹកភ្លៀង ចេញពីតំបន់មួយចំនួននៅក្នុងក្រុងកំពង់ឆ្នាំង ខណៈដែលទឹកភ្លៀងនៅតែបន្តធ្លាក់ជាប់ៗគ្នាស្ទើររាល់ថ្ងៃ ។

លោកអភិបាលក្រុងកំពង់ឆ្នាំងបានឱ្យដឹងទៀតថា តំបន់ដែលរងការលិចលង់ដោយជំនន់ទឹកភ្លៀងក្នុងក្រុងកំពង់ឆ្នាំង មាននៅភូមិដំណាក់ពពូល ក្រុងកំពង់ឆ្នាំង ដែលកំពុងតែកាយដាក់លូដើម្បីរំដោះទឹកចេញចម្ងាយ៣០០ម៉ែត្រ ប៉ុន្តែការងារនេះ បានធ្វើជិតរួចរាល់ទៅហើយ តែដោយសារភ្លៀងខ្លាំងពេកទើបមានការយឺតយ៉ាវ។

ក្រោយការចុះពិនិត្យផ្នែកខាងលើរួច លោក យិន សាវ៉េន ក៍បានបន្តដំណើរចុះមកពិនិត្យមើលស្ថានភាពទំនប់បង្ហៀរទឹក និងស្ពានឈើចាស់ទ្រុឌទ្រោមនៅភូមិកណ្តាល សង្កាត់ផ្សារឆ្នាំង។

ដោយមើលឃើញនូវការលំបាកក្នុងការធ្វើដំណើរឆ្លងកាត់ស្ពានឈើចាស់ទ្រុឌទ្រោមនោះ លោក ស៊ុន សុវណ្ណារិទ្ធិ អភិបាលខេត្ត តាមរយៈលោកយិន សាវេ៉ន អភិបាលក្រុងកំពង់ឆ្នាំងបានជួយឧបត្ថម្ភ ថវិកាចំនួន២០០ដុល្លារ រួមនឹងថវិកា អភិបាលក្រុងកំពង់ឆ្នាំងចំនួន៣០ម៉ឺនរៀលប្រគល់ជូនលោកមេភូមិដើម្បីជួសជុលស្ពាននេះឱ្យបានធើ្វដំណើរទៅមកបណ្តោះអាសន្ន ខណៈផ្លូវនេះ មមាញឹកក្នុងការធ្វើដំណើរទៅមក។

ក្នុងពេលនោះផងដែរ លោកអភិបាលក្រុងកំពង់ឆ្នាំងបានបន្តចុះទៅពិនិត្យមើលព្រែកមួយកន្លែងទៀតនៅចំណុចព្រែកពពាំង ស្ថិតក្នុងភូមិស្រែព្រីង សង្កាត់កំពង់ឆ្នាំង ដើម្បីរិះរកវិធីនាំយកគ្រឿងចក្រមកកាយបើកផ្លូវទឹករំដោះចេញ គ្រាដែលគេបានបិទចោលជាយូរឆ្នាំហើយ ដើម្បីបង្ហូរទម្លាក់ទៅទន្លេ បន្ធូរទឹកមួយផ្នែកមកខាងទំនប់ទ្វារទឹកខាងលើកុំឱ្យជន់លិចខ្លាំងពេក។

សូមជម្រាបជូនថា លោកស៊ុន សុវណ្ណារិទ្ធ អភិបាលខេត្តកំពង់ឆ្នាំងកាលពីថ្ងៃទី១៧ ខែកក្កដា ម្សិលមិញនេះ បានចាត់ឱ្យលោក ដោក ប៊ុនថុន ប្រធានមន្ទីរធនធានទឹកនិងឧតុនិយមខេត្តដឹកដីយកមកចាក់ទប់ការហូរច្រោះបាក់ផ្លូវនៅចំណុចទ្វារទឹកចំនួន៨រថយន្ត ហើយនៅថ្ងៃនេះដែរ ប្រធានមន្ទីរធនធានទឹកនិងឧតុនិយមខេត្តកំពង់ឆ្នាំងបានឱ្យរថយន្តដឹកថ្ម និងកន្ត្រកដែកយកមកដាក់ដើម្បីទប់ការហូរច្រោះបាក់ដីនៅគល់ទំនប់ផ្នែកខាងត្បូង ដើម្បីបញ្ចៀសការហូរច្រោះបាក់ធំឡើងបន្តទៀត។

ជាមួយគ្នានេះ ប្រធានមន្ទីរធនធានទឹក និងឧតុនិយមខេត្តកំពង់ឆ្នាំងក៏បានបញ្ជាក់ឱ្យដឹងនៅថ្ងៃទី១៨ ខែកក្កដានេះដែរថា៖ ស្ថានភាពកម្ពស់ទឹកទន្លេនៅស្ថានីយជលសាស្ត្រផ្សារក្រោមទឹកមានកម្ពស់ ៥,៤១ ម៉ែត្រ បើធៀបនឹងឆ្នាំ២០២១ កម្ពស់ទឹកទន្លេមានកម្ពស់៣,៦០ម៉ែត្រ។ ដោយឡែកស្ថានភាពកម្ពស់ទឹកភ្លៀងធ្លាក់នៅ៥ស្រុកមាន៦៨ មីល្លីម៉ែត្រ នៅស្រុកបរិបូរណ៍ ៕