សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅព្រឹកថ្ងៃទី១៩ ខែកក្កដា ឆ្នាំ២០២២ ក្រសួងបរិស្ថានបានរម្លឹក ពីប្រកាស ស្តីពី ការបង្កើត និងការដាក់ឱ្យប្រើប្រាស់រូបសញ្ញាសម្គាល់ ប្រភេទតំបន់ការពារធម្មជាតិ។
ក្រសួងបរិស្ថាន សម្រេច :
ប្រការ១…ត្រូវបានបង្កើត និងដាក់ឱ្យប្រើប្រាស់រូបសញ្ញាសម្គាល់ប្រភេទតំបន់ការពារធម្មជាតិ ដូចមានភ្ជាប់ ក្នុងឧបសម្ព័ន្ធ១ នៃប្រកាសនេះ។
ប្រការ២ …ទម្រង់នៃរូបសញ្ញាសម្គាល់ប្រភេទតំបន់ការពារធម្មជាតិ ត្រូវបានកំណត់យកទម្រង់ផ្នែកខាងក ដូចគ្នានឹងទម្រង់រូបសញ្ញាសម្គាល់អគ្គនាយកដ្ឋានតំបន់ការពារធម្មជាតិ ប៉ុន្តែផ្នែកខាងក្នុងត្រូវបានកំណត់ សម្គាល់ទៅតាមប្រភេទនិងលក្ខណៈវិនិច្ឆ័យនៃតំបន់ការពារធម្មជាតិនីមួយៗ ដែលបានបរិយាយនិងមាន ខ្លឹមសារ ដូចមានភ្ជាប់ក្នុងឧបសម្ព័ន្ធ២ នៃប្រកាសនេះ។
ប្រការ៣…រូបសញ្ញាសម្គាល់ប្រភេទតំបន់ការពារធម្មជាតិត្រូវប្រើប្រាស់ជាផ្លូវការ ដូចខាងក្រោម៖
-ដាក់នៅតាមស្នាក់ការ ស្នាក់ការរង និងតាមតំបន់ការពារធម្មជាតិ ដាក់នៅលើឯកសណ្ឋានរបស់មន្ត្រីឧទ្យានុរក្ស
-ប្រើប្រាស់ក្នុងករណីផ្សេងៗទៀតដែលចាំបាច់។
ប្រការ៤ …រាល់រូបភាពផ្នែកខាងក្នុងដែលមាននៅក្នុងទម្រង់នៃរូបសញ្ញាសម្គាល់ប្រភេទតំបន់ការពារធម្មជាតិ នីមួយៗ ដូចមានភ្ជាប់ក្នុងឧបសម្ព័ន្ធ១ អាចស្នើសុំធ្វើការផ្លាស់ប្តូរ ទៅតាមតម្រូវការចាំបាច់។
ប្រការ៥…នាយកខុទ្ទកាល័យ គ្រប់អគ្គនាយកនៃអគ្គនាយកដ្ឋាន អគ្គាធិការនៃអគ្គាធិការដ្ឋាន ប្រធាននាយកដ្ឋានសវនកម្មផ្ទៃក្នុង ប្រធាននាយកដ្ឋានវាយតម្លៃហេតុប៉ះពាល់បរិស្ថាន និងប្រធានគ្រប់អង្គភាពក្រោមឱវាទក្រសួងបរិស្ថាន ត្រូវអនុវត្តប្រកាសនេះ ចាប់ពីថ្ងៃចុះហត្ថលេខាតទៅ។
សូមបញ្ជាក់ថា, ប្រកាស ស្តីពី ការបង្កើត និងដាក់អោយប្រើប្រាស់រូបសញ្ញាសម្គាល់ប្រភេទតំបន់ការពារធម្មជាតិ របស់ក្រសួងបរិស្ថាន បានចេញតាំងពីថ្ងៃទី២៤ ខែធ្នូ ឆ្នាំ២០២១ ៕
ដោយ ៖ សុខ ខេមរា
