ព័ត៌មានទាន់ហេតុការណ៍៖

ក្មេងប្រុសម្នាក់រអិលជើងធ្លាក់ចូលទឹកជ្រៅបណ្តាលឱ្យលង់ស្លាប់

ចែករំលែក៖

ខេត្តបាត់ដំបង៖ យោងតាមរបាយការណ៍របស់សមត្ថកិច្ចខេត្តបាត់ដំបងដែលអង្គភាពយើងទើបតែទទួលបាននៅព្រឹកថ្ងៃទី១៣ ខែតុលា ឆ្នាំ២០២២នេះបានឱ្យដឹងថា,មានករណីក្មេងប្រុសម្នាក់ទៀតហើយខណៈកំពុងលេងទឹកដែលហូរកាត់ផ្លូវថ្នល់ក៏រអិលជើងធ្លាក់ចូលក្នុងប្រឡាយទឹកជ្រៅបណ្តាលឱ្យលង់ស្លាប់យ៉ាងអាណោចអាធ័ម។

របាយការណ៍ដដែលបានឱ្យដឹងទៀតថា,ហេតុការណ៍ដ៏រន្ធត់នេះបានកើតឡើងនៅវេលាម៉ោង ១៩និង០០នាទី ថ្ងៃទី១២ ខែតុលា ឆ្នាំ២០២២ នៅចំណុចលូទួលបេង ស្ថិតនៅក្នុងភូមិជ្រៃថ្មី  ឃុំជ្រៃ  ស្រុកថ្មគោល ខេត្តបាត់ដំបង។ 

សមត្ថកិច្ចបញ្ជាក់ថាប្រភពនៅកន្លែងកើតហេតុបានឱ្យដឹងថា ក្មេងប្រុសរងគ្រោះមានឈ្មោះ ឆាយ ស៊ីហ្វុង អាយុ០៩ឆ្នាំ រស់នៅភូមិក្បាលខ្មោច ឃុំជ្រៃ ស្រុកថ្មគោល ខេត្តបាត់ដំបង ក្មេងប្រុសរងគ្រោះខាងលើបានទៅលេងទឹកដែលហូរកាត់ថ្នល់ជាមួយមិត្តភក្តិពីរបីនាក់ ហើយមួយសន្ទុះក្រោយមកក៏ស្រាប់តែរអិលជើងធ្លាក់ចូលទៅកន្លែងជ្រៅ ភ្លាមនោះសាច់ញាតិក្មេងរងគ្រោះបានឃើញនិងបានហៅគេឱ្យជួយតែដោយសារទឹកជ្រៅនិងមេឃងងឹតផងពិបាកក្នុងការរាវរកដោយប្រើរយៈពេលជាងកន្លះម៉ោងទើបរកឃើញតែក្មេងប្រុសបានស្លាប់បាត់ទៅហើយ។

ក្រោយទទួលបានព័ត៌មាននេះភ្លាមសមត្ថកិច្ចប៉ុស្តិ៍នគរបាលរដ្ឋបាលជ្រៃបានចុះទៅពិនិត្យធ្វើកំណត់ហេតុនិងប្រគល់សពឱ្យក្រុមគ្រួសារយកទៅរៀបចំធ្វើបុណ្យតាមប្រពៃណីនៅវត្តអារញ្ញរាសី ហៅវត្តរូង ផងដែរ ៕

ដោយ៖ចន្ទ លីហ្សា


ចែករំលែក៖