សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីលោកវរសេនីយ៍ត្រី កាន់ វណ្ណៈ នាយប៉ុស្តិ៍នគរបាលរដ្ឋបាលស្រះចក បានឱ្យដឹងនៅរសៀលថ្ងៃពុធទី១៩ ខែតុលា ឆ្នាំ២០២២នេះថា៖ កម្លាំងសមត្ថកិច្ចជំនាញ នៃអធិការដ្ឋាននគរបាលខណ្ឌដូនពេញ សហការជាមួយកម្លាំងនគរបាលប៉ុស្តិ៍ស្រះចក បានឃាត់ខ្លួនយុវជន០២នាក់ ក្នុងចំណោមបក្ខពួក០៩ ដែលជាក្រុមអ្នកលេងកាំបិតហោះ យកមកសាកសួរ ដេីម្បីចាត់ការតាមច្បាប់។
លោកវរសេនីយ៍ត្រី កាន់ វណ្ណៈ បានឱ្យដឹងទៀតថា ករណីបង្រ្កាបការកាន់កាប់អាវុធដោយខុសច្បាប់(ដាក់កាំបិតបុ័ងតោក្នុងកាបូបស្ពាយ) បានធ្វេីឡេីងកាលពីយប់ថ្ងៃទី១៨ ខែតុលាម្សិលមិញនេះ នៅចំណុចមុខហាងប៊ូហ្វេស្កាយស្ហឹង ផ្លូវលេខ១៥៩ ភូមិ១ សង្កាត់ស្រះចកខណ្ឌដូនពេញ រាជធានីភ្នំពេញ។
ប្រភពដដែលបន្តថា យោងតាមដំណើររឿងហេតុ កាលពីវេលាម៉ោង ៧យប់ថ្ងៃទី១៨ ខែតុលា ឆ្នាំ២០២២ កម្លាំងផ្នែកយុត្តិធម៌ និងប៉ុស្តិ៍ បានល្បាតក្នុងមូលដ្ឋានទៅដល់ចំណុចមុខហាងប៊ូហ្វេស្កាយស្ហឹង ផ្លូវលេខ១៥៩ ភូមិ១ សង្កាត់ស្រះចក ខណ្ឌដូនពេញ រាជធានីភ្នំពេញ ឃើញក្មេងទំនើងមួយក្រុម មានគ្នា០៩នាក់ ជិះម៉ូតូ០៤គ្រឿង ពេលឃើញសមត្ថកិច្ចក្រុមនោះបានបើកម៉ូតូគេចខ្លួន ដោយមានសង្ស័យកម្លាំងយើងប្រដេញតាមធ្វើការឃាត់ខ្លួនបានជនសង្ស័យចំនួន០២នាក់ និងម៉ូតូមួយគ្រឿង ត្រួតពិនិត្យរកឃើញកាំបិតបុ័ងតោ ចំនួន០២ដើម នៅក្នុងកាបូបស្ពាយ ពណ៌ខ្មៅ ក៏នាំមកប៉ុស្តិ៍នគរបាលរដ្ឋបាលស្រះចក ដើម្បីធ្វើការសាកសួរតែម្តង។
ជនសង្ស័យទាំង២នាក់នេះ ទី១-ឈ្មោះ អ៊ុំ សំណាង អាយុ១៦ឆ្នាំ ភេទប្រុស មុខរបរសិស្ស ស្នាក់នៅភូមិព្រៃស្វាយ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ និងទី២-ឈ្មោះ សុខ សីហា ភេទប្រុស អាយុ១៤ឆ្នាំ មុខរបរ សិស្ស ស្នាក់នៅភូមិព្រៃស្វាយ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
វត្ថុតាំងចាប់យករួមមាន៖ កាំបិតបុ័ងតោ ចំនួន០២ដើម,កាបូបស្ពាយ ពណ៌ខ្មៅ ចំនួន០២,ទូរស័ព្ទដៃចំនួន០២គ្រឿង(ម៉ាក Iphone x ពណ៌ស និងម៉ាក Iphone 7 plus ពណ៌ផ្កាឈូក) និងម៉ូតូមួយគ្រឿងម៉ាក HONDA DREAM 125 ពណ៌ទឹកមាស សា្លកលេខ ភ្នំពេញ ១GE-៩៨២៧ លេខតួ+លេខម៉ាស៊ីន ៩៦៤៨៩១២។
-ចំពោះមុខកម្លាំងជំនាញខណ្ឌ-ប៉ុស្តិ៍ កំពុងប្រើប្រាស់វិធានការជំនាញសាកសួរចម្លើយបន្តរកបក្ខពួក និងកសាងសំណុំរឿងបញ្ជូនទៅសាលាដំបូងតាមនីតិវិធីច្បាប់។
គួរបញ្ជាក់ផងដែរថា ទិសដៅបន្តអធិការដ្ឋាននគរបាលខណ្ឌដូនពេញ ប៉ុស្តិ៍នគរបាលរដ្ឋបាលទាំង១១ នឹងបន្តខិតខំបង្ការ ទប់ស្កាត់បទល្មើសគ្រប់ប្រភេទដោយអនុវត្តន៍តាមអនុសាសន៍ដ៏ខ្ពង់ខ្ពស់របស់ លោកស្នងការ និងលោកអភិបាលខណ្ឌ៕
ដោយ៖ស តារា
