សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ក្រុមការងារចម្រុះរដ្ឋបាលក្រុងព្រះសីហនុ បានចុះធ្វើការណែនាំដល់ម្ចាស់ផ្ទះល្វែងដែលបានសាងសង់ និងតសំយ៉ាបលយមកលើចំណីផ្លូវសាធារណៈនៅបរិវេណអតីតមហោស្រព ស្ថិតនៅក្នុងសង្កាត់លេខ២ ក្រុងព្រះសីហនុ នាពេលកន្លងមក។ នេះបេីយោងតាមប្រភពព័ត៍មានពីរដ្ឋបាលខេត្តព្រះសីហនុ បានឱ្យដឹងនៅយប់ថ្ងៃទី០១ ខែវិច្ឆិកា ឆ្នាំ២០២២យប់មិញ។
រដ្ឋបាលខេត្ត បានឱ្យដឹងទៀតថា បច្ចុប្បន្នត្រូវបានម្ចាស់ផ្ទះបានចូលរួមសហការជាមួយអាជ្ញាធរក្រុងព្រះសីហនុ ស្ម័គ្រចិត្តរុះរើសំយ៉ាបទាំងនោះចេញដោយខ្លួនឯង និងរៀបចំចាប់ផ្តើមសម្អាត រៀបចំសណ្តាប់ធ្នាប់ របៀបរៀបរយនៅក្នុងបរិវេណទីតាំងខាងលេីនេះឱ្យកាន់តែមានសោភ័ណភាព បរិស្ថាន។
ជាមួយគ្នានេះ រដ្ឋបាលខេត្ត សូមបងប្អូនប្រជាពលរដ្ឋដែលជាម្ចាស់លំនៅដ្ឋាន ម្ចាស់ទីតាំងអាជីវកម្ម-សេវាកម្មគ្រប់ប្រភេទនៅតាមបណ្តោយផ្លូវសំខាន់ៗក្នុងក្រុងព្រះសីហនុ សូមចូលរួមរៀបចំសណ្តាប់ធ្នាប់ តុបតែងលម្អគេហដ្ឋាន និងទីតាំងអាជីវកម្ម-សេវាកម្មរៀងៗខ្លួនឱ្យបានស្អាត មានរបៀបរៀបរយ និងមានសោភ័ណភាពល្អ ដើម្បីត្រៀមរៀបចំអបអរសាទរពិធីបុណ្យសមុទ្រលើកទី៩ ជុំទី៣ និងមហាសន្និបាតក្លឹបឆ្នេរសមុទ្រស្អាតជាងគេលើសកលលោកឆ្នាំ២០២២ នាពេលខាងមុខឱ្យទទួលបានលទ្ធផលល្អ៕
ដោយ៖សហការី
