សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ មុខសញ្ញាលួចយកទ្រព្យសម្បត្តិ២នាក់ទៀត ត្រូវបានកម្លាំងនគរបាលស្រុកថ្មគោល ដឹកនាំដោយលោកវរសេនីយ៍ទោ ហៀង ប៊ុនថា អធិការរង ចុះស្រាវជ្រាវរហូតឈានដល់ការឃាត់ខ្លួនជាបន្ដបន្ទាប់ កាលពីថ្ងៃទី០៥ ខែវិច្ឆិកាម្សិលមិញនេះ យកមកសាកសួរដេីម្បីចាត់ការតាមច្បាប់។ នេះបេីយោងតាមប្រភពព័ត៌មានពីរបាយការណ៍របស់អគ្គស្នងការដ្ឋាននគរបាលជាតិ បានឱ្យដឹងនៅព្រឹកថ្ងៃអាទិត្យទី០៦ ខែវិច្ឆិកា ឆ្នាំ២០២២។
របាយការណ៍ដដែលបន្តថា ជនសង្ស័យឈ្មោះ ឆាយ សៅ ហៅ ជី ភេទប្រុស អាយុ២៤ឆ្នាំ មានទីលំនៅភូមិកណ្តាលជើងឃុំគោកឃ្មុំ ស្រុកថ្មគោល និងឈ្មោះ មាន វុទ្ធី ភេទប្រុសអាយុ៤០ឆ្នាំមានទីលំនៅ ភូមិច្រនៀង ឃុំគោកឃ្មុំ ស្រុកថ្មគោល មកកាន់អធិការដ្ឋាននគរបាលស្រុកថ្មគោល ដើម្បីសាកសួរស្រាវជ្រាវពាក់ព័ន្ធករណីលួចយកទ្រព្យសម្បត្តិអ្នកដទៃ។
សូមជម្រាបជូនថា មូលហេតុដែលឈានដល់ការឃាត់ខ្លួនជនសង្ស័យខាងលើនេះ គឺកាលពីថ្ងៃទី០៤ ខែវិច្ឆិកា ឆ្នាំ២០២២ វេលាម៉ោង០៤និង៣០នាទី ក្នុងលំនៅឋានរបស់ជនរងគ្រោះឈ្មោះ ទេព ញ៉ុន ភេទស្រី អាយុ៥៧ឆ្នាំ រស់នៅក្រុមទី២ ភូមិកណ្តាលជើង ឃុំគោកឃ្មុំ ស្រុកថ្មគោល ខេត្តបាត់ដំបង ត្រូវជនសង្ស័យមិនស្គាល់អត្តសញ្ញាណបានចូលលួចគ្រឿងអលង្ការ (ខ្សែ.កមាស) ទម្ងន់០៦ជី និងប្រាក់បាតថៃចំនួន ៤២,០០០បាត (បួនម៉ឺនពីពាន់បាត)។
នៅពេលបន្ទាប់ជនងរងគ្រោះបានប្តឹងពីករណីនេះមកនគរបាលស្រុក ហើយឆ្លងតាមរយៈការស្រាវជ្រាវស៊ើបអង្កេត សមត្ថកិច្ចកំណត់មុខសញ្ញាបានរហូតឈានដល់ការឃាត់ខ្លួនតែម្តង។
វត្ថុតាងដកហូតរួមមាន ៖ខ្សែ.កមាសនិងបណ្តោង (០១ខ្សែ ទម្ងន់០៦ជី), ទូរស័ព្ទដៃម៉ាកវីវូ ០១គ្រឿង។
បច្ចុប្បន្នជនសង្ស័យទាំង២នាក់ខាងលើ ត្រូវបានកម្លាំងនគរបាលស្រុកកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធីច្បាប់៕
ដោយ៖សហការី
